हामी सबैकाे संसारन्यूज

१५ पुस, काठमाडौं । नेपाल कम्युनिष्ट पार्टी (नेकपा) को प्रचण्ड–माधव समुहको स्थायी कमिटीको बैठक आज पार्टी कार्यालय पेरिस डाडाँमा बस्ने भएको छ ।

पेरिसडाँडामा दिउँसो १२ बजे बस्न लागेको सचिवालय सदस्य र स्थायी कमिटीको संयुक्त बैठकले प्रधानमन्त्री केपी शर्मा ओलीको कदमविरुद्ध आन्दोलनका थप कार्यक्रमबारेमा छलफल गरिने बताइएको छ । साथै सोहि बैठकले दिउँसो ३ बजे पत्रकार सम्मेलन गरेर कार्यक्रमबारे जानकारी दिनेछ ।

प्रधानमन्त्री ओलीको सिफारिसमा राष्ट्रपति बिद्यादेवी भण्डारीले संसद विघटन गरेसँगै त्यसको विरोधमा नेकपाको प्रचण्ड–माधब समुहले मंगलबार उपत्यकामा बृहद विरोध प्रदर्शन गरिसकेको छ । हरेक दिन कुनै न कुनै आन्दोलनका कार्यक्रम गर्ने बताएको उक्त समूहले नेकपाका नेता तथा प्रवक्ता नारायणकाजी श्रेष्ठको नेतृत्वमा आन्दोलन परिचालनका लागि समिति नै गठन गरेको छ ।

उता पार्टी भित्रैबाट असहज पारिएकाले काम गर्न नपाएको भन्दै प्रतिनिधिसभा विघटन गरेका  नेकपाका अध्यक्ष तथा प्रधानमन्त्री केपी शर्मा ओली नेतृत्वको समूहले विभिन्न जिल्लाका कार्यकर्ताहरुको भेला आयोजना तथा प्रशिक्षणका कार्यक्रमहरुलाई तिब्ररुपमा अघि बढाएको छ । यहि सिलसिलामा ओली समूहले बबरमहलस्थित कार्की ब्यांकेटमा नेकपा सूदुरपश्चिम प्रदेशका कार्यकर्ताहरुको भेला तथा प्रशिक्षण कार्यक्रमको आयोजना गरेको छ ।

दिउँसो १२ बजेका लागि बोलाइएको उक्त भेला तथा प्रशिक्षणमा प्रधानमन्त्री ओली आफै सहभागी हुने भएका छन् ।