Sansar News
पुस १७, काठमाडौं । राष्ट्रिय सभाको अधिवेशन आज (शुक्रबार)देखि सुरु हुने भएको छ । बैठक अपरान्ह चार बजेदेखि बोलाइएको राष्ट्रिय सभाका सचिव राजेन्द्र फुयाँलले जानकारी दिए ।
राष्ट्रपति विद्यादेवी भण्डारीले शुक्रबार अपरान्ह ४ बजेदेखि अधिवेशनको आव्हान गरेकी छिन् । बैठकको सुरुवात राष्ट्रपतिले बैठक आव्हान गरेको पत्र पढेर सुनाएपछि सुरु हुने सचिव फुयाँलले जानकारी दिए ।
आजदेखि सुरु हुने राष्ट्रिय सभाको बैठकमा राष्ट्रिय सभामा प्रतिनिधित्व गर्ने नेताहरुले उद्घाटन मन्तव्य राख्ने कार्यसूची छ । प्रतिनिधि सभा विघटित भएको कारण राष्ट्रिय सभा बैठकमा सरकारको सिफारिसमा राष्ट्रपति कार्यालयबाट जारी गरिएका विभिन्न ७ अध्यादेशहरु पेश हुनेछन् ।
यसअघि बिहिबार बसेको कार्यव्यवस्था समितिको बैठकले अधिवेशनको कार्यसूची तय गरेको थियो ।
वि.सं.२०७७ पुस १७ शुक्रवार १३:१२ मा प्रकाशित
