Sansar News
पुस १८, काठमाडौं । प्रधानमन्त्री केपी शर्मा ओली नेतृत्वको नेकपाका नेता रामबहादुर थापा बादलले प्रचण्ड र नेपालले राजनीतिक ‘कु’ गर्न खोजेपछि संसद विघटन गरेको बताएका छन् । शनिबार काठमाडौंमा आयोजित ओली पक्षीय कार्यकर्ता भेलालाई सम्बोधन गर्दै उनले यस्तो बताएका हुन् ।
‘उहाँहरुले प्रधानमन्त्रीलाई संसदमा बहुमत बनाएर अविश्वासको प्रस्ताव ल्याउने योजनाहरु अगाडि सार्नुभयो, एक ढंगको राजनीतिक ‘कु’ भनौं, ‘कु’को दिशातिर अगाडि बढ्ने नै उहाँहरुको अडान देखेपछि प्रधानमन्त्रीले आफ्नो विशेषाधिकारलाई प्रयोग गनुभएको हो’, थापाले भने ।
उनका अनुसार संसद विघटनको निर्णय राजनीतिक ‘कु’लाई रोक्न चालिएको कदम थियो । थापाले संसद विघटनको कदम निकै शाहसिक भएको बताए ।
‘यो ठूलो राजनीतिक कदम हो, राजनीतिक ‘कु’लाई रोक्ने, एक ढंगको प्रतिगमनलाई रोक्ने ठूलो राजनीतिक कदम हो’, थापाले भने, ‘यो एउटा शाहसिक कदम पनि हो ।’
वि.सं.२०७७ पुस १८ शनिवार १६:०६ मा प्रकाशित
