Sansar News
पुस १९, काठमाडौं । नेकपा विभाजनसँगै बागमती प्रदेशभित्र सुरु भएको राजनीतिक खेलले नयाँ मोड लिन थालेको छ । विभाजनसँगै मुख्यमन्त्री डोरमणि पौडेलविरुद्व प्रचण्ड–नेपाल पक्षले राखेको अविश्वास प्रस्ताव नै असफल हुने स्थितिसमेत बन्न थालेको छ । अविश्वासको प्रस्तावमा हस्ताक्षर गरेका तीन सांसदले हस्ताक्षर फिर्ता लिएसँगै यस्तो देखिएको हो ।
अविश्वास प्रस्तावमा हस्ताक्षर गर्ने तीन सांसद प्रकाश श्रेष्ठ, रमा आलेमगर र कृष्ण भुर्तेलले हस्ताक्षर फिर्ता लिएका हुन् । उनीले आफुँहरुले हस्ताक्षर फिर्ता लिएको पनि जानकारी प्रदेशसभा सचिवालयलाई गराएका छन् ।
पार्टी विभाजनसँगै मुख्यमन्त्री डोरमणि पौडेलविरुद्व प्रचण्ड–नेपाल पक्षले ४५ सांसदको हस्ताक्षरमा अविश्वासको प्रस्ताव दर्ता गराएको थियो । जसमध्ये तीन सांसदले हस्ताक्षर फिर्ता लिएका छन् ।
११० सदस्यीय बागमती प्रदेशसभामा नेकपाका ८० सांसद छन् । जसमध्ये ४५ सांसदले पौडेलविरुद्व हस्ताक्षर गरि अविश्वासको प्रस्ताव दर्ता गराएका थिए । तर, तीन जनाले फिर्ता लिएसँगै मुख्यमन्त्री पौडेलको पक्षमा ३८ सांसद देखिएका छन् ।
साथै हस्ताक्षर गरेका केही सांसद थप ढुलमुल पनि छन् । नेकपाको केन्द्रमा केही नेता तथा सांसदले रातारात कित्ता परिवर्तन गरेको घटनालाई हेर्दा हस्ताक्षर गरेका थपले पनि फिर्ता गर्न सक्ने सम्भावना कायमै छ ।
अविश्वासको प्रस्ताव पारित गर्न जटिल
यसै पनि अविश्वासको प्रस्ताव पारित गराउन बहुमत सदस्य अर्थात ५६ सांसदको मत चाहिन्छ । तर, प्रचण्ड–नेपाल पक्षसँग हालसम्म ४२ सांसदको मात्रै सहमती छ ।
अविश्वास प्रस्ताव पारित गराउन सभाको अर्को ठूलो दल कांग्रेसको साथ चाहिन्छ । तर हालसम्म पनि कांग्रेसले सोबारे निर्णय गरिसकेको छैन् । कांग्रेससँग २२ सांसदको मत छ ।
वि.सं.२०७७ पुस १९ आइतवार १५:०८ मा प्रकाशित
