हामी सबैकाे संसारन्यूज

माघ १, काठमाडौं । पुष्पकमल दाहाल ‘प्रचण्ड’ र माधवकुमार नेपाल नेतृत्वको नेपाल कम्युनिष्ट पार्टी (नेकपा)को स्थायी समिति बैठक आज बस्ने भएको छ । नेकपाका स्थायी समिति सदस्य गणेश शाहका अनुसार बैठक दिउसो ३ बजेदेखि बस्दैछ ।

यसअघि नेकपाका अध्यक्षद्वय प्रचण्ड र नेपालले बुधबार साँझ कांग्रेस सभापति शेरबहादुर देउवासँग छलफल गरेका थिए । देउवासँगको छलफलपश्चात प्रचण्ड–नेपालले पार्टीको स्थायी समिति बैठक बोलाएका हुन् ।

नेता गणेश शाहका अनुसार आजको बैठकमा सरकारको प्रतिगामी कदमका विरुद्व सबै शक्तिसँग भईरहेको संवाद र सहकार्यबारे पनि छलफल हुनेछ ।

‘स्थायी समितिको बैठक बस्ने कुरा यसअघि नै तय भएको थियो, मेरो जानकारीमा बैठकका एजेण्डा पनि अधिकांश यसअघि नै तय भएका थिए’, संसार न्यूजसँगको कुराकानीमा नेता शाहले भने, ‘पछिल्लो समय ओली सरकारको प्रतिगामी कदमविरुद्व संघर्षका कार्यक्रम सञ्चालन गर्न सबै शक्तिसँग भईरहेको छलफलबारे आजको बैठकमा कुराकानी हुन्छ, जसमा कांग्रेससँगको विषय पनि रहने कुरा स्वभाविक छ ।

उनका अनुसार आजको बैठकमा कांग्रेससँग पछिल्लो समय भईरहेको वार्ताको उपलब्धिबारे पनि छलफल हुनेछ । शाहले जनाएअनुसार बैठकमा माधव नेपाल नेतृत्वको कार्यदलको कामबारे पनि समिक्षा गर्ने कार्यक्रम छ ।

संसद विघटनको विरुद्वमा संघर्ष चलाईरहेको प्रचण्ड–नेपाल नेतृत्वको नेकपाले सबै पार्टीसँग मोर्चाबन्दीबारे प्रस्ताव गरेको थियो । कांग्रेससँग पनि नेकपाले प्रस्ताव गरेको छ । तर, कांग्रेसले भने हालसम्म कुनै जवाफ नदिएको बताइएको छ ।

यसअघि नेकपाले आयोजना गरेको अन्तक्रियात्मक कार्यक्रममा ओली नेतृत्वको सरकारविरुद्व संघर्ष गर्न मोर्चाबन्दी गर्नेबारे छलफल भएको थियो । जसमा नेताहरुले प्रचण्ड–नेपाल पक्षलाई नै आन्दोलनबारे स्पष्ट हुन आग्रह गरेका थिए ।

कांग्रेस सभापति देउवासँगको छलफलपश्चात बोलाइएको बैठकलाई अर्थपूर्णं रुपमा हेरिएको छ ।