हामी सबैकाे संसारन्यूज

माघ ११, काठमाडौं । प्रतिनिधि सभा विघटनविरुद्व दायर रिटमाथिको सुनुवाई संवैधानिक इजलासमा गत आइतबारदेखि जारी छ । मुद्दामाथि सातौं दिन आज पनि सुनुवाई हुँदैछ ।

प्रतिनिधि सभा विघटनविरुद्व सर्वोच्चमा १३ थान रिट दायर भएका छन् । जुन रिटमाथि प्रधानन्यायाधीश चोलेन्द्रशमशेर जबरासहित न्यायाधीशहरु विश्वम्भरप्रसाद श्रेष्ठ, अनिलकुमार सिन्हा, सपना मल्ल र तेजबहादुर केसीको संवैधानिक इजलासले गत आइतबारदेखि बहस गरिरहेको छ ।

मुद्दामा शुक्रबारसम्म रिट निवेदकका तर्फबाट ३५ कानून व्यवसायीले बहस गरिसकेका छन् । निवेदकका तर्फबाट करिब २ सय ५० जना कानून व्यवसायीहरुले बहसका लागि निवेदन दिएका छन् । सर्वोच्च बार र नेपाल बार एशोसियसनबाट मगाएका पाँच जना एमिकस क्युरी र महान्यायाधीवक्ता अग्नि खरेलले पनि बहस गर्नेछन् ।

गत पुस ५ मा प्रधानमन्त्री केपी शर्मा ओलीले प्रतिनिधि सभा विघटन गरिदिएका थिए । जुन विघटनविरुद्व सर्वोच्चको संवैधानिक इजलासमा गत पुस ११ देखि बहस सुरु भएको थियो । बहस संवैधानिक इजलास कि पूर्णं इजलासमा गर्ने भन्ने विवाद जन्मिएपछि गत माघ २ गते संवैधानिक इजलासमै बहस गरिने आदेश भएको थियो ।