Sansar News
१२ माघ, काठमाडौँ । प्रतिनिधिसभा विघटन गर्ने सरकारको निर्णयका विरुद्धमा सोमबार नागरिक समाजले गरेको बृहद् नागरिक प्रदर्शनमा प्रहरी हस्तक्षेप भएको छ ।
प्रहरीले प्रदर्शनकारीमाथि कुटपिट गर्ने तथा पानीको फोहरो प्रयोग गर्दा झण्डै एकदर्जन घाइते भएका छन् भने केही व्यक्ति सम्पर्कबाहिर रहेको हुँदा गिरफ्तार भएको हुन सक्ने जनाइएको छ ।
प्रहरीको कुटाइका कारण निर्गराज जैशी गम्भिर घाइते भएका छन् । उनको टाउकोमा निकै गम्भीर चोट लागेको र अहिले पनि उनी बेहोस रहेको जनाइएको छ ।
त्यस्तै कुलदिप शर्मा, जनक ढुंगाना, शुरज तामाङ, यादव ढुंगाना, शुरज तामाङ, सम्राट थापा, किरण श्रेष्ठ र गोविन्द भण्डारा घाइते भएका छन् भने विनोद शर्मा, मञ्जित श्रेष्ठ र कुशल श्रेष्ठ गिरफ्तार भएको हुन सक्ने विद्यार्थी नेतृ आरती लामाले जानकारी दिइन् ।
कमलपोखरी हुँदै बालुवाटार पुगेका उनीहरुले भाटभटेनी पुगेर कोणसभा गरेपछि सुरक्षा घेरा तोडेका थिए । सो क्रममा प्रहरीले हस्तक्षेप गरेको हो ।
तस्विर : आरती लामा
वि.सं.२०७७ माघ १२ सोमवार १९:३० मा प्रकाशित
