Sansar News
१३ माघ, काठमाडौं । बेल्जियममा रहेका नेपाली युवा कृष्ण क्षेत्री त्यहाँको एक नगरपालिकाको कार्यकारी सदस्य बन्न सफल भएका छन् ।
बेल्जियमको लुभेन नगरपालिकाको गतवर्ष सम्पन्न निर्वाचनमा बैकल्पिक सदस्यको रुपमा निर्वाचित भएका क्षेत्रीले सोमबार (जनवरी -२५) मा नगरपालिकाको पूर्णकालिन सदस्यको रुपमा सपथ लिएका छन् ।
उनले नगरपालिकावासी तथा बेल्जियममा रहेका नेपाली दाजुभाइ तथा दिदीबहिनीको सहयोगको कारण आफूले यस्तो सुअवसर पाएको भन्दै नगरवासी र नेपाली समाुदायको पहिचान र प्रगतिको लागि अहोरात्र खट्ने प्रविद्धता समेत गरेका छन् ।
गतवर्ष बेल्जियममा राष्ट्रवादी पार्टीको रुपममा चिनिने एनभिए पार्टीको उम्मेदवारकामे सूचीमा सातौ नम्बरमा क्षेत्रीले उम्मेदवारी दिएका थिए । ४७ सदस्यीय नगरपालिका परिषद्को निर्वाचनमा एनभिएले ११ सिट हात पार्न सफल भएको थियो ।
रोजगारीको सिलसिलामा सन् २००४ मा बेल्जियम पुगेका पर्वत जलजला गाउँपालिकाका क्षेत्री बेल्जियममा रेष्टुरेण्ट पेशामा आवद्ध रहेका छन् । उनी श्रीमती सगुन केसी र छोराछोरीसहित बेल्जियममा बस्दै आएका छन् ।
वि.सं.२०७७ माघ १३ मंगलवार १५:०१ मा प्रकाशित
