Sansar News
१४ माघ, काठमाडौं । नेपालमा आजबाट सुरु भएको कोरोना भाइरसविरुद्धको खोप अभियान अन्तर्गत आज पहिलो चरणमा देशैभरी २९०१ जनाले खोप लगाएका छन् ।
आज दिउँसो १ बजेसम्मको तथ्यांक अनुसार प्रदेश १ मा १२७, प्रदेश २ मा ५४०, बागमतीमा १००२, गण्डकीमा २०६, लुम्बिनीमा २२३, कर्णालीमा ३९८ र सुदूरपश्चिम प्रदेशमा ३०५ जना गरी २९०१ जनाले खोप लगाइसकेका स्वास्थ्य तथा जनसंख्या मन्त्रालयले जनाएको छ ।
भारतबाट ल्याइएको १० लाख कोभिसिल्ड खोप आज देशैभरी रहेका ३ सय खोप केन्द्रमार्फत् स्वास्थ्यकर्मी, सरसफाईकर्मी, एम्बुलेन्स चालक लगायत अग्रपक्तिमा खटिने सेवा प्रदायक हरुलाई लगाइएको हो ।
मन्त्रालयले आगामी १० दिनभित्रमा ४ लाख ३० हजार नेपालीमा लगाइसक्ने पनि जनाएको छ ।
खोप लगाएका कारण हालसम्म कुनैपनि अवान्छित घटना नभएको पनि मन्त्रालयका प्रवक्ता जागेश्वर गौतमले जानकारी दिएका छन् ।
वि.सं.२०७७ माघ १४ बुधवार १६:१६ मा प्रकाशित
