हामी सबैकाे संसारन्यूज

माघ १४, काठमाडौं । नेकपाको विवादमा निर्वाचन आयोगले गरेको निर्णयलाई प्रधानमन्त्री केपी शर्मा ओली पक्षीय नेता ईश्वर पोखरेलले स्वागत गरेका छन् । उनले आयोगको निर्णयले नेकपा सकिनबाट जोगिएको बताए ।

विभाजित नेकपाका अर्का अध्यक्ष पुष्पकमल दाहाल प्रचण्डको पार्टीलाई सिध्याउन अनेकन आपराधिक खेलहरु खेलेको भन्दै उनले निर्वाचन आयोगको निर्णयसँग त्यस्तो खेल पनि सकिएको बताए । उनका अनुसार प्रचण्ड पार्टी एकतादेखि नै समिकरण बनाउने र त्यसैको बलमा ढाडमा टेकेर टाउकोमा हान्ने आपराधिक अभ्यासमा थिए ।

‘गुटवन्दी वा अन्तर्विरोधहरूलाई उपयोग गरेर नयाँ ‘समिकरण’ बनाउने र त्यसकै बलमा ‘ढाडमा टेकेर टाउकोमा हान्ने’ पुष्पकमल दाहाल ‘ प्रचण्ड ‘ ले लामै समयदेखि आफूमा हुर्काउँदै ल्याएको अवसरवादी, अविश्वसनीय र आपराधिक अभ्यास र त्यसका कारणले सिर्जना हुनपुगेको राजनीतिक अस्थीरताको झण्झावात, अराजकता र उद्दण्डताको सिलसिलाको शंखघोष हुनथाल्यो जुन मुलुकका लागि अत्यन्त अपशकुन वा दुर्भाग्यको गंभीर संकेत बन्न पुग्यो’, पोखरेलले भनेका छन्, ‘यही अपशकुनलाई मध्यनजर गर्दै निर्वाचन आयोगले त्यही ‘ऐतिहासिक प्रारम्भिक ‘ विन्दूमा उभिनुपर्ने अपरिहार्य आवश्यकतालाई औंल्याएको छ, धन्यवाद छ, निर्वाचन आयोगलाई !’

निर्वाचन आयोगको निर्णयलाई नेकपालाई पुनः एकताबद्ध गर्ने अवसर मिलेको भन्दै पोखरेलले नयाँ धारबाट एकता गर्नुपर्ने पनि बताएका छन् । उनले पुरानो सोंच र प्रवृत्ति मानिसलाई छाड्दै नयाँ पंक्ति पार्टीमा आउनुपर्ने बताए । उनका अनुसार ‘आउट डेटेड’हरुको समय सकिएको छ ।

उनले भनेका छन्, ‘नेकपाभित्र “आउट डेटेडहरू” बाहिरिने र “अपडेटेड“ भएर अघि बढ्नुपर्ने ऐतिहासिक क्षण आइपुगेकोछ ! नेकपा त अघि बढ्छ-बढ्छ साथै , नेपालको राजनीतिक तथा सामाजिक आन्दोलनका अभियन्ताहरू, सबैका लागि एउटा महत्वपूर्ण शिक्षा बन्नसक्छ नेकपाको जीवनसित गाँसिएर प्रकट भएको अहिलेको घटना !’