हामी सबैकाे संसारन्यूज

माघ २१, काठमाडौं । नेपालमा कोरोना भाइरस (कोभिड–१९)बाट संक्रमण हुनेको संख्या निरन्तर घटिरहेको छ । स्वास्थ्य तथा जनसंख्या मन्त्रालयका अनुसार पछिल्लो केहि सातादेखि कोरोना संक्रमणको दर निरन्तर ओरालोमा छ ।

मन्त्रालयका अनुसार पछिल्लो २४ घण्टामा पनि संक्रमित हुनेभन्दा निको हुनेको संख्या दोब्बर छ । जनाइएअनुसार पछिल्लो २४ घण्टामा १४२ जनामा कोरोना संक्रमण देखिएको छ तर, २४ घण्टाकै बीचमा २०६ जना निको पनि भएका छन् ।

स्वास्थ्य मन्त्रालयको आधिकारिक तथ्यांकअनुसार नेपालमा हालसम्म २ लाख ७१ हजार ४३१ जना कोरोनाबाट संक्रमित भएका छन् । जसमध्ये २ लाख ६७ हजार ६५ जना कोरोना मुक्त पनि भईसकेका छन् । मन्त्रालयको तथ्यांकअनुसार ९८.४ प्रतिशत संक्रमित पूर्णं निको भईसकेका छन् ।

कोरोनाबाट मृत्यु हुनेको संख्या नगन्य अवस्थामा

कोरोना संक्रमणबाट मुक्त हुनको संख्या बढेसँगै संक्रमणबाट मृत्यु हुनेको संख्या पनि निरन्तर घटेको छ । स्वास्थ्य मन्त्रालयका अनुसार पछिल्लो २४ घण्टामा १ जनाको ज्यान गएको रिपोर्ट प्राप्त छ ।

मन्त्रालयले उक्त मृत्यु कोरोना संक्रमणसँगै अन्य कारणहरुबाट पनि भएको जनाएको छ । मन्त्रालयका अनुसार पछिल्लो केहि सातादेखि संक्रमणबाट मृत्यु हुनेको संख्या नगन्य अवस्थामा छ ।