२५ माघ, काठमाडौँ । अखिल नेपाल महिला संघ(अनेमसंघ)ले भागिरथी भट्टको बलत्कारपछि हत्या भएको घटनालाई लिएर गृह प्रशासन के गरीरहेको छ ? भन्ने प्रश्न गरेको छ ।
विद्यालयबाट घर फर्किएरहेकी भट्टको क्षतिवक्षत अवस्थामा शव फेला परेको र घटना भएको यति दिन बितिसक्दा पनि कोही पनि पक्राउ पर्न नसकेको भन्दै अनेमसंघले गृह प्रशासनसँग यस्तो प्रश्न गरेको हो ।
अनेमसंघकी संयोजक अमृता थापाद्वारी प्रेस विज्ञप्तिमा समाजमा यस्ता दुखद् घटना खटिरहनु दुखद् भएको जनाउँदै भगिरथ भट्टको हत्याको घटनाले गम्भिर ध्यानाकर्षण भएको बताइएको छ ।
विज्ञप्तिमा २१ औँ शताब्दिमा पनि यस्ता मानवता विरोधी, हिंस्रक, आपराधिक जतिसुकै निन्दा र भत्र्सना गर्दा पनि नपुग्ने पाशविक घटना भएको जनाइएको छ ।
संविधानले प्रत्याभूत गरेको बाँच्न पाउने अधिकारको हनन भएको बताउँदै के एउटी छोरी विद्यालय गएर पढ्न, हिड्ड्ल गर्न र पूर्ण आयु शान्तिपूर्ण रुपमा बाँच्न पाउँदिनन् ? यदि पाउँछिन् भने हत्या हुने वातावरण किन र कसरी बन्छ ? हत्या नै नहुने वातावरण किन बन्न सकेन ? जस्ता गम्भिर प्रश्नहरु गरिएका छन् ।
घटनाको प्रकृति हेर्दा कतै बलत्कार पछि अपराध छोप्न हत्या गरिएको त हैन भन्ने गम्भिर आशंका जन्माएको उल्लेख गर्दै उक्त घटनाको तुरुन्त छानबीन गरि सत्यतथ्य बाहिर ल्याउन र दोषीमाथि कडा कार्वाही गर्न पनि अनेमसंघले जोडदार माग गरेको छ ।
बैतडी जिल्ला दोगडा केदार गाउँपालिका वडा नं ७ की वर्ष १७ की भागिरथी भट्ट विद्यालयबाट घर फर्किने क्रममा हराएकी हुन्छिन् भने माघ २२ गते क्षतविक्षत अवस्थामा उनको शव फेला परेको थियो ।
वि.सं.२०७७ माघ २५ आइतवार १२:४४ मा प्रकाशित