हामी सबैकाे संसारन्यूज

फागुन २, काठमाडौं । रुपन्देहीको तिलोत्तमा नगरपालिकाका मयेर बासुदेव घिमिरे र उपमेयर जगेश्वरीदेवी चौधरी नेकपाको ओली समूहमा लागेका छन् । आइतबार प्रचण्ड–नेपाल समूह परित्याग गर्दै उनीहरु ओली समूहमा लागेका हुन् ।

ओली समूहका नेता तथा अर्थमन्त्री विष्णु पौडेलले उनीहरुलाई आफ्नो समूहमा भित्र्याएका छन् । यसको पुष्टी स्वंय पौडेलले आफ्नो फेसबुकमार्फत गरेका छन् ।

मेयर र उपमेयरसँगको तस्बिर फेसबुकमा शेयर गर्दै पौडेलले लेखेका छन् – साथै छौं, साथै रहनेछौं ।

ओली समूहको जनसभामा सहभागी हुन गएका पौडेलले मेयर र उपमेयरलाई आफ्नो समूहमा भित्र्याएका थिए ।

तिलोत्तमा नगरपालिका प्रचण्ड–नेपाल समूहका नेता घनश्याम भुसालको गृहनगर र निर्वाचन क्षेत्र हो । यसअघि पार्टी विभाजन हुँदै गर्दा मेयर घिमिरे र उपमेयर चौधरी प्रचण्ड–नेपाल समूहतिर लागेको थिए ।

विभाजनपश्चात ओली समूहले दुवैलाई केन्द्रीय समितिमा राखेपनि दुवैले अस्वीकार गरेका थिए । तर, एकाएक उनीहरु ओली समूहतिर लागेसँगै प्रचण्ड–नेपाल समूहमा ठूलो हलचल मच्चिएको छ ।