Sansar News
४ फागुन, काठमाडौं । संसद विघटनको मुद्दामा आजदेखि अदालतको सहयोगी (एमिकस क्युरी) को बहस सुरु हुनेछ । पक्ष र विपक्षको बहस तथा निवेदकतर्फको जवाफ सोमबार सकिएसँगै आजदेखी एमिकस क्युरीको बहस सुरु हुन लागेको हो ।
माघ ४ बाट निरन्तर सुनुवाइ भइरहेको संवैधानिक इजलासमा आजदेखि एमिकस क्युरीले राय दिने क्रम प्रारम्भ हुनेछ । यो मुद्दामा सर्वोच्च अदालतको आदेशअनुसार नेपाल बार एशोसिएशनबाट ३ जना र सर्वोच्च अदालत बार एशोसिएसनबाट २ जना एमिकस क्युरीमा सिफारिस भएका छन् ।
जसअनुसार नेपाल बारबाट बद्रीबहादुर कार्की, विजयकान्त मैनाली र सतीशकृष्ण खरेल तथा सर्वोच्च अदालत बार एशोसिएसनबाट पूर्णमान शाक्य र गीता पाठक एमिकस क्युरीको रुपमा चयन भएका छन् ।
एमिकस क्युरीले कुनै पक्ष विपक्षमा नरही अदालतलाई राय दिनेछन् । उनीहरुको रायपछि फैसला आउनेछ ।
संसद विघटनको मुद्दा सर्वोच्च अदालतमा प्रधानन्यायाधीश चोलेन्द्रशम्शेर जबरा, न्यायाधीशहरु विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी सम्मिलित संवैधानिक इजलासमा सुनुवाई भइरहेको छ ।
वि.सं.२०७७ फागुन ४ मंगलवार ०८:२९ मा प्रकाशित
