Sansar News
७ फागुन, काठमाडौं । बैतडीकी भागरथीको हत्या अभियोगमा पक्राउ परेका किशोर नाबालक रहेको खुलेको छ ।
बैतडीको दोगडाकेददार गाउँपालिका ७ चडेपानीकी भागरथीको हत्यामा संलग्न रहेको आरोपमा पक्राउ परेका दिनेश भट्ट १६ वर्ष र भागरथीको उमेर १८ वर्ष रहेको र उनीहरु दुवै नाबालक रहेको खुलेको छ ।
पीडितका परिवारले दिएको जाहेरीमा किशोरको उमेर अन्दाजी १८ र भागरथीको उमेर १७ वर्ष रहेको थियो । तर, प्रहरीले बिहिबार उनीहरु पढ्ने सनातन धर्म माविबाट झिकाएको दुवैजनाको प्रमाणमा दुवैजना नाबालक देखिएका छन् । प्रहरीका अुनसार किशोरको जन्ममिति २०६१ फागुन १० गते रहेको र भागरथीको जन्ममिति २०५९ बैशाख ५ गते भएको पाइएको पनि शुक्रबारको कान्तिपुर दैनिकमा समाचार छ ।
भागरथी हत्यामा संलग्न रहेको आरोपमा पक्राउ परेका दिनेशले प्रहरीको थप अनुसन्धानमा भागरथीको घडी फालेको स्थानको बारेमा जानकारी दिएको र उनले भनेको ठाउँमा पुगेर खोजी गर्दा घटनास्थल नजिकैको खोल्सामा घडी फेला परेको समेत प्रहरीले जनाएको छ ।
आरोपित भट्टलाई बुधबार जिल्ला अदालतबाट ५ दिनको म्याद थप गरी हिरासतमा राखेर विस्तृत अनुसन्धान गरिरहेको पनि प्रहरीले जनाएको छ ।
माघ २१ गते स्कुल गएकी भागरथी भट्टको अर्कोदिन माघ २२ गते दोगडाकेदार गाउँपालिकाको लबलेक जंगलकोको खोचलेकमा हत्या गरिएको अवस्थामा शब भेटिएको थियो ।
वि.सं.२०७७ फागुन ७ शुक्रवार ०९:०० मा प्रकाशित
