हामी सबैकाे संसारन्यूज

१ चैत्र, धनुषा । सिरहाको लहानस्थित मालपोत कार्यालयमा भएको बम विस्फोट घटनाको जिम्मेवारी जनतान्त्रिक तराई मुक्ति मोर्चा (क्रान्तिकारी) गोइत समूहले लिएको छ ।

८ जना घाइते हुनेगरी भएको विस्फोट आफूले गराएको भन्दै प्रेस विज्ञप्ति जारी गरी विस्फोटको जिम्मेवारी सो समूहले लिएको हो ।
मधेस स्वतन्त्र देश हुनुपर्ने माग राख्दै सशस्त्र संघर्षरत गोइत समूहले तराई मधेसमा भ्रष्टाचार तथा अपराध बढ्दै गएको भन्दै विरोध स्वरुप विस्फोट गराएको जनाएको छ ।

आइतबार दिउँसो लहान नगरपालिका–८ दुई नम्बर रोडस्थित मालपोत कार्यालयको कर्मचारी बस्ने कोठामा विस्फोटक पदार्थ विस्फोट हूदा ८ जना घाइते भएका हुन् ।

विस्फोटमा परी लहान नगरपालिका–१६ बस्ने ५२ वर्षीय लालबहादुर विक, विष्णुपुर गाउँपालिका–३ बस्ने मालपोत कार्यालयका नायब सुब्बा ३८ वर्षीय शिव कुमार यादव, सिरहा धनगढीमाई नगरपालिका–४ बस्ने ३० वर्षीय दिनेशकुमार भण्डारी, गोलबजार नगरपालिका–६ बस्ने ३५ वर्षीया लक्ष्मी राणा, सोही ठाउँ बस्ने ३५ वर्षीया बेचनी मगर, गोलबजार नगरपालिका–४ बस्ने ३८ वर्षीया फूलकुमारी ठाकुर, धनगढीमाई नगरपालिका–१३ बस्ने ८२ वर्षीय भोलाबहादुर पाचे मगर र भगवानपुर गाउँपालिका–३ बस्ने ५४ वर्षीय बद्रिनारायण यादव घाइते भएका छन् ।

घाइतेहरुमध्ये दिनेशकुमारको अवस्था गम्भीर तथा लालबहादुर विक, फूलकुमारी ठाकुर र बद्रिनारायण यादवको अवस्थामा मध्यम रहेको जिल्ला प्रहरी कार्यालय सिरहाले जनाएको छ ।