१८ माघ,काठमाडौँ । नेकपा (माओवादी)को सहायक सङ्गठन योङ कम्युनिस्ट लिगले आगामी वैशाख ९ गते राष्ट्रिय सम्मेलन गर्ने भएको छ । वाइसिएलको आज यहाँ सम्पन्न एकता बैठकले उक्त निर्णय गरेको वाइसिएलका नेता रामप्रसाद सापकोटाले जानकारी दिनुभयो ।
एकता बैठकले नेपबहादुर कुँवरको संयोजकत्वमा ३९९ सदस्यीय केन्द्रीय सम्मेलन आयोजक समितिसमेत गठन गरेको छ । सम्मेलनले १५१ सदस्यीय केन्द्रीय समिति र १३ सदस्य नबढाई पदाधिकारी बनाउने र पदाधिकारीसहित केन्द्रीय समितिमा प्रत्यक्ष निर्वाचन गर्ने कार्यविधिसमेत बैठकले पारित गरेको छ ।
यस्तै बैठकले युवालाई सहज रुपमा रोजगारी प्रदान गर्न, तत्काल स्थानीय निकायको निर्वाचनको मिति घोषणा गर्नुपर्नेलगायतका राजनीतिक एजेन्डासमेत पारित गरेको छ । वाइसिएलको एकता बैठकको आजै प्रधानमन्त्री पुष्पकमल दाहाल ‘प्रचण्ड’ले उद्घाटन गर्नुभएको थियो । रासस
