हामी सबैकाे संसारन्यूज

२५ चैत, काठमाडौं । मन्त्रीहरु टोप बहादुर रायमाझी, लेखराज भट्ट, प्रभु शाह र गौरी शंकर चौधरीको सांसद पद खारेज हुने भएको छ ।

नेपाल कम्युनिष्ट पार्टी (माओवादी केन्द) ्रले पार्टी परित्याग गरेका ४ जना नेताहरुको सांसद पद खारेजीका लागि निवेदन दिएसँगै उनीहरुको सांसद पद खारेज हुने भएको हो ।

‘नेपाल कम्युनिष्ट पार्टी (माओवादी केन्द्र) प्रतिनिधिसभा संसदीय दलले राजनैतिक दल सम्बन्धी ऐन २०७३ को दफा ३४ बमोजिम प्रतिनिधिसभामा पेश गरेका छौं, ऐ दफा ३४ (२) ले तोकेको प्रक्रिया बमोजिम सम्बन्धीत सदन तथा सभामा समेत पेश गर्नुहुन अनुरोध छ’ भन्ने व्यहोरोको प्रचण्डको पत्र मंगलबार सो दलका प्रमुख सचेतक देव गुरुङले संघीय संसदको सचिवालयमा दर्ता गराए लगत्तै चार मन्त्रीको सांसद पद खारेजीको प्रक्रिया अघि बढेको हो ।

यसैबीच लुम्बिनी प्रदेशका दुई सांसद पद मुक्त भैसकेका छन् । सो दलको प्रदेश संसदीय दलको पत्र अनुसार सांसदहरु दिनेश पन्थी र दधिराम न्यौपानेले दल परित्याग गरेको जानकारी सभामुखले प्रदेशसभामा गराए लगत्तै उनीहरु पदमुक्त भएका छन् ।

नेकपा (माओवादी केन्दू) का अनुसार गृहमन्त्री रहेका रामबहादुर थापा ‘बादल’ राष्ट्रियसभा सदस्य भएकाले उनको विषयमा पनि जानकारी गराउने तयारी गरिएको छ । सांसद नै नरहेका मन्त्री मणि थापा र दावा लामा भने पार्टीबाट मात्रै निश्कासित हुनेछन् ।