Sansar News
वैशाख ६, काठमाडौं । नेकपा (एमाले)को महाधिवेशन आयोजक कमिटीको बैठकले कर्णाली प्रकरणमा निलम्बित नेता माधवकुमार नेपालसहित २० नेतामाथि अन्तिम स्पष्टीकरण सोध्ने निर्णय गरेको छ । प्रधानमन्त्री निवास बालुवाटारमा बसेको बैठकले माधवकुमार नेपालसहित भीम रावल, सुरेन्द्र पाण्डे, घनश्याम भुसाल, प्रकाश ज्वालासहित २० नेताहरुमाथि स्पष्टीकरण सोध्ने निर्णय गरेको हो ।
कर्णाली प्रदेशमा ‘फ्लोर क्रस’ गर्न लगाउने र गर्ने सबै नेतामाथि २ दिनको समयसीमा दिँदै अन्तिम स्पष्टीकरण सोध्ने निर्णय गरेको बैठकमा सहभागी एक नेताले बताए । उनका अनुसार बैठकले अन्तिम स्पष्टीकरण चित्तबुझ्दो नभए आगामी १० गते बस्ने अर्को बैठकले कारबाही गर्नेछ ।
गत शुक्रबार कर्णाली प्रदेशसभामा भएको मतदानमा एमालेका ४ सांसदले फ्लोर क्रस गर्दै मुख्यमन्त्री महेन्द्रबहादुर शाहीको पक्षमा मतदान गरेका थिए । ४ सांसदको मतदानसँगै शाही सरकारले विश्वासको मत पाएको थियो ।
त्यस्तै बैठकले गत पुस ७ मा तत्कालिन नेकपा केन्द्रीय समितिमा मनोनित ११ सयभन्दा बढि सदस्यलाई एमालेको राष्ट्रिय प्रतिनिधि परिषद् सदस्यमा रुपान्तरित गरेको छ । बैठकले आगामी साउन २५ देखि २७ गतेसम्म राष्ट्रिय प्रतिनिधि परिषद्को बैठक राख्ने पनि निर्णय गरेको छ ।
वि.सं.२०७८ वैशाख ६ सोमवार १६:४५ मा प्रकाशित
