हामी सबैकाे संसारन्यूज

१४ बैशाख,काठमाडौं । कोरोना संक्रमणबाट भारतमा दुईै दिनमै ५ नेपालीले ज्यान गुमाएका छन् ।

ज्यान गुमाउनेमा डेढ दशकदेखि दिल्लीमा बस्दै आएका बुटवलका ५४ वर्षीय विष्णु पौडेलको सोमबार मृत्यु भएको छ ।

उनका आफन्त शिवलाल गौतमका अनुसार सफदरगन्ज अस्पतालमा उपचारका क्रममा मृत्यु भएको छ ।

त्यस्तै सोमबार नै अर्का नेपाली चन्द्र घर्ती मगरको पनि मृत्यु भएको छ । उत्तर भारत नेपाल तरुण दलका कोषाध्यक्ष चन्दरहम्जाली मगरका अनुसार घर्ती दिल्लीको अलीगाउँमा रेष्टुराँ व्यवसाय गर्दै आएका थिए ।

अर्घाखाँचीका ३५ वर्षीय दीपक विकको पनि कोरोना संक्रमणबाट मृत्यु भएको छ । नोयडास्थित जिम्स अस्पतालमा सोमबार उनको मृत्यु भएको छिमेकी विष्णु केसीले बताएको मंगलबारको कान्तिपुर दैनिकमा समाचार छ ।

त्यस्तै गोवामा कैलालीका ३० वर्षीया राधा तिरुवाको पनि उपचारकै क्रममा सोमबार मृत्यु भएको हो । अखिल भारत नेपाली एकता समाजका आरबी खड्काका अनुसार उनका श्रीमानको आइसीयूमा उपचार भइरहेको छ । रुकुमको मुसिकोटका ५७ वर्षीय शिवप्रसाद महतको संक्रमणकै कारण नासिकमा आइतबार मृत्यु भएको हो ।