हामी सबैकाे संसारन्यूज

वैशाख १४, काठमाडौं । गण्डकी प्रदेशका मुख्यमन्त्री पृथ्वीसुब्बा गुरुङविरुद्व दर्ता अविश्वासको प्रस्तावमाथि अन्य समस्या नआए बुधबारको बैठकमा मतदान हुने सम्भावना छ । वैशाख २ मा दर्ता अविश्वासको प्रस्ताव सोमबारदेखि सुरु प्रदेशसभाको विशेष अधिवेशनमा अहिले छलफलको क्रममा छ ।

नेपाली कांग्रेस संसदीय दलका नेता कृष्णचन्द्र नेपालीलाई आगामी मुख्यमन्त्रीको रुपमा अगाडि सारिएको अविश्वासको प्रस्तावमा कांग्रेससहित माओवादी केन्द्र र जसपाका सांसदहरुको समर्थन छ । प्रस्तावमा निर्णायक मानिएको तीन सांसदसहितको राष्ट्रिय जनमोर्चाले समर्थन जनाए पनि हस्ताक्षर भने गरेको छैन् । हालसम्म स्वतन्त्र सांसद दीपक गुरुङले पनि कसलाई समर्थन गर्ने टुंगो लगाएका छैनन् ।

स्पष्ट छैन् राजमो

सत्ता अंकगणितमा निकै महत्व पाएको राष्ट्रिय जनमोर्चाले अविश्वाव प्रस्तावको पक्षमा मत हाल्छ वा हाल्दैन् अहिलेसम्म पनि स्पष्ट छैन् । प्रदेश सरकारलाई समर्थन गर्ने वा नगर्ने भन्ने विषयमा स्वंय राजमोभित्रै पनि विवाद छ ।

तीन सांसद भएको जनमोर्चाको अस्पष्टताको कारण कुन पक्षले जित वा हार व्यहोर्छ अन्यौंल छ । यसअघि जनमोर्चाको केन्द्रका र प्रदेश तहका दुई थरि भनाई बाहिर आएका थिए । प्रदेश तहबाट हालको मुख्यमन्त्रीलाई सहयोग गर्ने र केन्द्रबाट मुख्यमन्त्रीलाई कुनै हालतमा सहयोग नगर्ने बताइएको थियो ।

दुई थरि मनोविज्ञानको कारण सांसदहरुले पार्टीको निर्देशन बाहिर मतदान गर्नसक्ने सम्भावना छ । साथै लुम्बिनी घटना गण्डकीमा राजमोको कारण दोहोरिने सम्भावना पनि रहेको बताइएको छ ।

सबैभन्दा डर माओवादीभित्रै

कर्णाली र लुम्बिनी घटनाले गण्डकीमा कस्तो समस्या ल्याउँछ स्पष्ट छैन् । कर्णालीमा एमाले र लुम्बिनीमा जसपा विभाजित भएसँगै माओवादीभित्र पनि एमाले प्रवेश गरेको पूर्वमाओवादी समूहले समस्या पार्न सक्ने अड्कलबाजी हुन थालेको छ । एमाले प्रवेश गरेका गृहमन्त्री रामबहादुर थापा नजिक देखिएका केहि सांसदले फ्लोर क्रस गर्नसक्ने चिन्ता माओवादीभित्र छ ।

माओवादी एक नेताका अनुसार मुख्यमन्त्री गुरुङले आफ्नो पक्षमा तान्न कतिपय सांसदलाई विभिन्न अफरसमेत अगाडि सारेका छन् । जनाइएअनुसार मुख्यमन्त्री गुरुङले माओवादी केन्द्रका सांसदलाई एक्ला एक्लै भेट्दै मन्त्रीको अफरसमेत गरिरहेका छन् ।

विगतमा बादल नजिक देखिएका ती सांसद मन्त्रीको लोभमा भड्किने सक्ने सम्भावना रहेको बताइएको छ । मुख्यमन्त्री गुरुङले अविश्वासको प्रस्तावलाई सहज पार गर्छु भन्नुको कारण पनि माओवादी सांसदको भूमिका रहेको कतिपयले बताएका छन् ।

स्वंय प्रस्तावक रहेको माओवादी केन्द्रभित्र फ्लोर क्रस भए अविश्वासको प्रस्ताव असफल हुने निश्चित रहन्छ ।

सांसदहरुको बास रिसोर्टमा

केहि दिनदेखि कांग्रेस, माओवादी केन्द्र र जसपाले सांसदहरुको बास रिसोर्टमा गराएको छ । लुम्बिनी र कर्णाली प्रदेश घटनाबाट चेत पाएको तीन दलले सांसद जोगाउने उपाय स्वरुप यस्तो गरेको हो ।

केहि दिनदेखि नै कांग्रेस, माओवादी केन्द्र र जसपाले सांसदहरुलाई लेकसाईडस्थित कुटी रिसोर्टमा राखेका छन् । जनाइएअनुसार केहि दिनदेखि सांसदहरुलाई नजरबन्द शैलीमा उक्त रिसोर्टमा राखिएको छ । नेताहरुले भने छलफलको लागि यस्तो उपाय अबलम्बन गरिएको बताएका छन् ।

६० सदस्यीय प्रदेशसभामा नेकपा एमालेका मात्रै २७ सांसद छन् । जहाँ १५ सांसद भएको कांग्रेस, ११ सांसद भएको माओवादी र २ सांसद भएको जसपाले संयुक्त रुपमा मुख्यमन्त्रीविरुद्व अविश्वासको प्रस्ताव दर्ता गराएका थिए । प्रदेशसभामा एमालेलाई आफ्नो पक्षमा बहुमत देखाउन थप ४ जना र गठबन्धन दललाइृ बहुमत देखाउन थप ३ सांसदको समर्थन चाहिन्छ ।