Sansar News
वैशाख २२, काठमाडौं । राष्ट्रियसभाको उपनिर्वाचनमा एमाले–एमालेबीच भिडन्त हुने भएको छ ।
बागमती प्रदेशतर्फ रिक्त पदमा हुन लागेको उपनिर्वाचनमा प्रधानमन्त्री केपी शर्मा ओली नेतृत्वको एमालेतर्फबाट रामबहादुर थापा ‘बादल’लाई उम्मेवादर बनिरहँदा नेपाली कांग्रेस, नेकपा (माओवादी केन्द्र), जसपासहितको गठबन्धनबाट एमालेको माधवकुमार नेपाल समूहका डा. खिमलाल देवकोटालाई साझा उम्मेदवारका रुपमा अघि सारिएको हो । उपेन्द्र यादवको निवास हात्तिवनमा दलहरुबीच भएको छलफलमा राष्ट्रिय सभाको साझा उम्मेदवार बनाउने विषयमा छलफल भएको थियो ।
माधव पक्षबाट उम्मेदवार बनेपनि देवकोटा माओवादी केन्द्रको गोलाकारभित्रको हँसिया हथौडा चुनाव चिन्हबाट लड्नेछन् । बागमतीमा एमालेको एकल बहुमत भएपनि माधव पक्षबाट साझा उम्मेदवार बनाइएसँगै गठबन्धन बलियो देखिएको छ ।
यसैबीच दलहरुबीच लुम्बिनी प्रदेशसभामा रिक्त पदमा कांग्रेसका दृगनारायण पाण्डेलाई अघि सार्ने सहमती भएको छ । पाण्डे हालै एमाले प्रदेशसभाबाट राजीनामा दिई कांग्रेस प्रवेश गरेका थिए ।
निर्वाचन आयोगले बागमती र लुम्बिनी प्रदेशका दुई सिटको लागि आगामी जेठ ६ गते उपनिर्वाचन गर्दैछ ।
वि.सं.२०७८ वैशाख २२ बुधवार १६:०५ मा प्रकाशित
