Sansar News
वैशाख २८, काठमाडौं । काठमाडौं उपत्यकामा जारी निषेधाज्ञा थप दुई साता लम्बिने भएको छ । काठमाडौं, भक्तपुर र ललितपुर जिल्लाका प्रमुख जिल्ला अधिकारीहरुको बैठकले यस्तो निर्णय गरेको हो ।
काठमाडौंका प्रमुख जिल्ला अधिकारी कालीप्रसाद पराजुलीका अनुसार आगामी सातामा निषेधाज्ञामा थप कडाई गरिनेछ । उनका अनुसार अत्यावश्यकबाहेकका कार्यालयसमेत बन्द गर्ने निर्णय भएको छ ।
साथै होटल तथा पार्टी प्यालेसमा हुने विवाहका कार्यक्रममा पनि रोक लगाइएको उनले बताए । उनका अनुसार घरमा गरिने यस्ता कार्यक्रममा समेत १० जनाभन्दा बढि सहभागी गराउन पाईने छैन् ।
पराजुलीले जनाएअनुसार अत्यावश्यक सामाग्री खरिदमा पनि केहि समय थप गरिएको छ । अब बिहान १० बजेसम्म अत्यावश्यक सामाग्रीका पसलहरु खुल्ला हुनेछन् ।
कोरोना भाइरस (कोभिड–१९)को संक्रमण तीव्र फैलिएसँगै उपत्यकाका तीन वटै जिल्लामा पहिलो पटक वैशाख १६ देखि २२ गतेसम्म निषेधाज्ञा जारी भएको थियो । तर निषेधाज्ञापश्चात पनि कोरोना संक्रमण तिव्र बनेसँगै निषेधाज्ञा थप गरिँदै लगिएको हो ।
सोमबार मात्रै देशभर ९ हजार २ सय ७१ कोरोना संक्रमित थपिएका थिए । जसमध्ये उपत्यकामा मात्रै आधा संक्रमित देखिएका थिए ।
वि.सं.२०७८ वैशाख २८ मंगलवार १४:३७ मा प्रकाशित
