Sansar News
३० बैशाख, काठमाडौं । नेपाल कम्युनिष्ट पार्टी (माओवादी केन्द्र) ले कोरोना महामारीविरुद्ध एकजुट हुन प्रवासी नेपालीलाई अपिल गरेको छ ।
पार्टीका प्रवास समन्वय कमिटीका अध्यक्ष युवराज चौलागाईँले विदेशमा रहेका नेपाली दाजुभाइ दिदी बहिनीहरुले स्वदेशमा बस्ने नेपाली दाजुभाई दिदीबहिनीको पक्षमा सोच्नुपर्ने बेला आएको भन्दै यो संकटपूर्ण घडीमा सबैलाई एकजुट हुन अपिल गरेका हुन् ।
‘सबै प्रवासी नेपाली संघसंगठन लगायत सम्पूर्ण प्रवासी नेपाली दाजुभाइ दिदीबहिनीहरुलाई यस्तो संकटपूर्ण घडीमा अक्सिजन, एम्बुलेन्स लगायत अन्य प्रतिरोधी औषधि, उपकरण तथा सेवाका निमित्त आ–आफ्नो ठाउँबाट सहयोग प्रदान गर्न विनम्र अनुरोध गर्दछौं,’ अध्यक्ष चौलागाईँद्धारा विहीबार जारी अपिलमा भनिएको छ,‘नेकपा (माओवादी केन्द्र) को प्रवास कमिटीले यस सम्बन्धी इच्छुक प्रवासी संघ–संस्थाहरु मिलेर सक्दो सहयोगी कार्य गरिरहने जानकारी गराउँदछौं ।’
वि.सं.२०७८ वैशाख ३० बिहीवार १७:४५ मा प्रकाशित
