Sansar News
१८ जेठ, काठमाडौँ । सर्वोच्च अदालतमा परेकाे प्रतिनिधिसभा विघटनको मुद्दा आजपनि यसअघिकै संवैधानिक इजलासले हेर्ने भएको छ ।
प्रधानन्यायाधीश चोलेन्द्रशम्सेर जबराले आफूसहित न्यायाधीशहरु दीपककुमार कार्की, डा. आनन्दमोहन भट्टराई, तेजबहादुर केसी र बमकुमार श्रेष्ठको इजलास ताेकेका छन् ।
केसी र श्रेष्ठले आफूहरुले सुनुवाइलाई निरन्तरता दिने बताएपछि प्रधानन्यायाधीश चोलेन्द्रशम्सेर जबराले यसअघि इजलासमा रहेका न्यायाधीसहरूलाई नै निरन्तरता दिएका हुन् ।
संवैधानिक इजलासमा न्यायाधीश श्रेष्ठ र केसीलाई राख्न नहुने वकिलहरूले अडान लिएपछि इजलास गठन बारे चर्को विवाद चलेको थियो । उनीहरू माथि प्रश्न उठेपछि सोमबारको सुनुवाइ स्थगित गरिएको थियो ।
प्रतिनिधिसभाको पछिल्लो विघटनको मुद्दाको संवैधानिक इजलासको प्रारम्भिक दुई दिनको सुनुवाइमा पनि यी दुई न्यायाधीश सम्मिलित भएको हुँदा उनीहरुलाई राख्न नहुने तर्क वकिलहरुले गर्दै आएका छन् ।
वि.सं.२०७८ जेठ १८ मंगलवार ११:४९ मा प्रकाशित
