हामी सबैकाे संसारन्यूज

जेठ १८, काठमाडौं । नेकपा (एमाले)मा पार्टी विभाजन रोक्न अन्तिम पटक फेरि प्रयास थालिएको छ । माधवकुमार नेपाल पक्षले छुट्टै पार्टी घोषणा गर्ने तयारी गरिएको बेला पुनः एकता जोगाउन प्रयास थालिएको हो । पछिल्लो पटक संवादका लागि दोस्रो तहका नेताहरु सक्रिय बनेका छन् ।

पार्टी विवाद मिलाउनका लागि भन्दै अध्यक्ष केपी शर्मा ओली र वरिष्ठ नेता माधवकुमार नेपाल पक्षका दोस्रो तहका नेताहरु सोमबार राती संवादमा जुटेका थिए । सोमबार राती भएको वार्तामा नेपाल पक्षबाट घनश्याम भुसाल, सुरेन्द्र पाण्डे, गोकर्ण विष्ट र योगेश भट्टराई सहभागी थिए भने ओली पक्षका तर्फबाट अर्थमन्त्री विष्णु पौडेल, संसदीय दलका उपनेता सुवास नेम्वाङ र परराष्ट्रमन्त्री प्रदीप ज्ञवाली सहभागी थिए ।

झण्डै चार घण्टासम्म चलेको वार्ता निकै सकारात्मक भएको नेताहरुले बताएका छन् । बताइएअनुसार सोमबारको वार्तासँगै माधव पक्षका थप १२ नेतामाथि गर्न लागिएको कारबाही रोकिने सम्भावना छ ।

यसअघि अध्यक्ष ओलीले वरिष्ठ नेता माधवकुमार नेपालसहित उनी पक्षका ११ नेतालाई पार्टी सदस्यसमेत नरहने गरि निष्कासन गरेका थिए ।

कति सम्भव छ एकता जोगाउन ?

अध्यक्ष ओलीले माधव नेपालसहित उनी पक्षीय ११ नेतालाई पार्टी सदस्यसमेत नरहने गरि निकाष्सन गरेका छन् । अहिले ओलीले पुनः घनश्याम भुसालसहित १२ नेतालाई कारबाहीको तयारी गरेका छन् । ओलीले मागेको २४ घण्टे स्पष्टीकरण नेताहरुले दिन अस्वीकार गरेका थिए ।

स्पष्टीकरण नबुझाएका नेताहरुलाई मंगलबार बस्ने स्थायी समिति बैठकमार्फत कारबाही गर्ने तयारी ओलीले गरेका छन् । सोमबार युवा संघको जुम मिटिङ्गलाई सम्बोधन गर्ने क्रममा पनि ‘पार्टीभित्रका गलत तत्वलाई ठेगान लगाएरै छाड्ने’ कुरा ओलीले बताएका थिए ।

यस्तोमा ओलीले पुनः पार्टी एकताको पहल गर्ने सम्भावना निकै कमजोर देखिन्छ । अहिले ओलीले माधव पक्षका एक पछि अर्को नेताहरुलाई कारबाही गरिरहेका छन् भने माधव पक्षले पनि बेग्लै पार्टी बनाउने अभियान थालेको छ । हालै मात्र माधव पक्षका युवा नेताहरुले निर्वाचन आयोगमा नेकपा (एकता केन्द्र) नामक पार्टी दर्ताको निवेदन बुझाएका थिए ।

अहिले माधव पक्ष सर्वोच्चको निर्णयको पर्खाइमा छ । उसले सर्वोच्चको निर्णयको आधारमा पार्टी दर्ता कहिले गर्ने निर्णय गर्ने तयारी गरेको छ ।

वार की पारको लडाईँ चलिरहेको एमालेमा मिल्ने सम्भावना भने कमजोर रहेको धेरैको टिप्पणी छ । घनश्याम भुसालकै भनाईलाई आधार मान्दा पनि ओली संविधान र व्यवस्था नै खारेज गर्ने अभियानमा लागेका छन् । यस्तो अवस्थामा माधव समूह ओलीका कदममा साँक्षी बन्ने सम्भावना कमजोर छ ।

यसबीच कतिपय नेताहरु भने पार्टी एकताको नाममा गुट परिवर्तनको खेलमा सहभागी हुने सम्भावना छ । यसअघि माधव नेपाल समूहका दर्जनौं नेताहरुले यहि बाहानामा समूह परिवर्तन गरेका थिए ।

पछिल्लो समय योगेश भट्टराई, गोकर्ण विष्ट र सुरेन्द्र पाण्डेको भूमिकालाई पनि शंकापूर्णं रुपमा हेरिएको छ ।