Sansar News
जेठ १९, काठमाडौं । नेपाली कांग्रेसले लुम्बिनी प्रदेशका मुख्यमन्त्री शंकर पोखरेलको राजीनामा माग गरेको छ । कांग्रेस प्रदेश संसदीय दलका प्रमुख सचेतक फखरुद्दिन खानले प्रदेशसभामा अल्पमतमा देखिएका मुख्यमन्त्रीलाई विश्वासको मत लिन वा राजीनामा दिन माग गरे ।
बुधबारको प्रदेश सभा बैठकलाई सम्बोधन गर्दै उनले जालझेल गरेर सत्तामा नबस्न चेतावनी दिए । पोखरेल संविधानको कुन धाराअन्तर्गत मुख्यमन्त्री बनेको हो स्पष्ट पार्न पनि खानको माग छ ।
‘आज ३० दिन पुगेको छ । कि उहाँले विश्वासको मत लिनुपर्छ । नभए उहाँले अविलम्ब राजीनामा दिएर मार्गप्रशस्त गर्नुपर्छ,’ उनले भने ।
संविधानको धारा १६८ को १ अनुसार मुख्यमन्त्रीमा नियुक्ती भएको भने पनि सो धाराअनुसार नियुक्ती भएजस्तो नदेखिएको उनको भनाई छ ।
मुख्यमन्त्री पोखरेलको नियुक्ती शुरुदेखि नै विवादमा छ । बहुमत भए नभएको स्पष्ट नै नभई प्रदेश प्रमुखले उनलाई मुख्यमन्त्रीमा नियुक्ती गरेका थिए । जसको विपक्षी गठबन्धनले निरन्तर विरोध गर्दै आएका छन् ।
वि.सं.२०७८ जेठ १९ बुधवार १५:२९ मा प्रकाशित
