Sansar News
जेठ २०, काठमाडौं । नेकपा (एमाले)को स्थायी समिति बैठक अनिश्चितकालका लागि स्थगित भएको छ । बिहिबार अपरान्ह ४ बजेका लागि बोलाइएको बैठक अन्तिम समय स्थगित भएको हो ।
यसअघि बुधबार पनि अन्तिम समय बैठक स्थगित भएको थियो ।
बताइएअनुसार माधवकुमार नेपाल समूहका नेताहरुसँगको वार्ता निष्कर्षमा नपुगेको कारण बैठक स्थगित गरिएको हो । यसअघि सोमबार राति याक एण्ड यति होटलमा दुई पक्षबीच भएको वार्तापश्चात मंगलबार बसेको बैठकले पार्टी एकताका लागि हदैसम्म लचिलो भएर जाने निर्णय गरेको थियो ।
त्यसयता भएका वार्ताहरु निष्कर्षमा नपुगेको कारण स्थायी समिति स्थगित गरिएको बताइएको छ । अहिले माधव समूह तिर देखिएका ४ नेता ओली समूहतिर जान वार्तामा छन् ।
माधव समूह तिर देखिएका नेताहरु योगेश भट्टराई, गोकर्ण विष्ट, सुरेन्द्र पाण्डे र घनश्याम भुसाल ओली पक्षसँग निरन्तर वार्तामा छन् । उनीहरुले ‘२०७५ जेठ २’ को अवस्थामा पार्टी संरचनालाई फर्काइनुपर्ने माग राखिरहेका छन् ।
वि.सं.२०७८ जेठ २० बिहीवार १५:१७ मा प्रकाशित
