हामी सबैकाे संसारन्यूज

जेठ २३, काठमाडौं । प्रतिनिधि सभा विघटनविरुद्व परेका रिटमाथि सुनुवाई गर्न प्रधानन्यायाधीश चोलेन्द्र शमशेर राणाले संवैधानिक इजलासको पुनर्गठन गरेका छन् । उनले वरिष्ठताको आधारमा संवैधानिक इजलास गठन गरेका हुन् ।

पुनर्गठित संवैधानिक इजलासमा प्रधानन्यायाधीश राणासहित न्यायाधीशहरू दीपककुमार कार्की, मिरा खड्का, ईश्वर खतिवडा र आनन्दमोहन भट्टराई छन्। उनीहरूलाई संवैधानिक इजलासका लागि बनाइएको रोस्टरबाट वरिष्ठताका आधारमा इजलासमा राखिएको हो।

यसअघि प्रधानन्यायाधीश राणाले गठन गरेको संवैधानिक इजलासका न्यायाधीशहरु बमकुमार श्रेष्ठ र तेजबहादुर केसीको विषयमा कानुन व्यवसायीहरुले प्रश्न उठाएका थिए। नेकपा विवादसम्वन्धी मुद्दा सुनुवाइ गरेकाले उनीहरु संवैधानिक इजलासमा बस्न नमिल्ने जिकीर कानुन व्यवसायीहरुले गरेका थिए ।

गत जेठ ७ गते मध्यरातमा भएको प्रतिनिधि सभा विघटनविरुद्व सर्वोच्चमा ३० वटा रिट परेका छन् । ति रिटमाथि आइतबारदेखि संवैधानिक इजलासमा सुनुवाई हुँदैछ ।