हामी सबैकाे संसारन्यूज

कृष्णप्रसाद पौडेल ‘जस्ताघरे’
विदुर.-४,बट्टार, नुवाकोट

यहाँ बाबा माता शिखरपथका हुन् साँच्चिकै सर्जक ।
वधू छोरा छोरी सकलजनका हुन् दर्बिला तारक ॥
खुबै भोगी हुन्छन् सजगपनका पाकाहरू कर्मका ।
सबै पाका मान्छे अनुपम खुदा हुन् यो धराधामका ।१।

युवा जत्था हाम्रा सकल घरका जान्छन् भने बाहिर ।
यही चाला बढ्दा अब मुलुक यो रित्तिन्छ है आखिर ॥
सहारा हुन् सारा युवक युवती मातापिता जीर्णका ।
सबै पाका मान्छे अनुपम खुदा हुन् यो धराधामका ।२।

दशा पीडा जाग्दा तकलिफ हुँदा हेर्ने यहाँ को छ र ?
पिताको माताको पिर विरहको सुन्ने यहाँ को छ र ??
व्यथा मर्का बुझ्ने सकस हरने छन् कृष्णजी राधिका ।
सबै पाका मान्छे अनुपम खुदा हुन् यो धराधामका ।३।

हिजो उम्दा ताजा बल र सिपले सङ्घर्षले होमिए ।
सधैँ लालाबाला मुटुसरि भनी काया सबै अर्पिए ॥
वधू छोरा छोरी मृदुगण बनून् मातापिता रुग्णका ।
सबै पाका मान्छे अनुपम खुदा हुन् यो धराधामका ।४।

गरा पाखा बारी फल बिउ दिने बाँझो हुँदा दिक्क छन् ।
पँधेरो चौतारो पनि हरघड़ी सुर्ता गरी बस्दछन्॥
कठै बाबा आमा विचलित भए जिल्ला कुना गाउँका ।
सबै पाका मान्छे अनुपम खुदा हुन् यो धराधामका ।५।

छन्द : छाया
गण : य – म – न – स – त – त – गु
सङ्केत : ISS – SSS – III – IIS – SSI – SSI – S
अक्षर : १९
विश्रामः ६ र १२ मा