हामी सबैकाे संसारन्यूज

२५ जेठ, काठमाडौँ । विश्व हिन्दु युवा संघले नेपाल गॉजा वैधानिकरण महाअभियानको राष्ट्रिय समिति गठन भएकोमा बधाई तथा शुभकामना दिएको छ ।

विश्व हिन्दु युवा संघका केन्द्रीय सदस्य तथा गाँजा विभाग प्रमुख समेत रहेका जोसेफ मदन कोइरालाको अध्यक्षतामा गाँजा वैधानिक महाअभियान गठन भएकोमा बधाई तथा शुभकामना दिएको हो ।

संघले हार्दिक बधाई तथा शुभकामना भन्दै निकालेको वक्तव्यमा भनिएको छ ‘जनताको समृद्धिको चाहनालाई पुरा गर्ने दायित्वमा गाजा वैधानिक महाअभियान सफल रहोस् । विश्व हिन्दु युवा संघको सम्पूर्ण परिवारको तर्फबाट हार्दिक बधाई तथा शुभकामना । ’

नेपाली जनताको समृद्धिको अन्तिम आशा नै गाँजा भएको भन्दै संघले सल्लाहकार समितिका संयोजक वरिष्ठ अभियन्ता तथा गाजाविज्ञ राजिव काफ्लेको नेतृत्वमा विज्ञ तथा अभियन्ता सम्मिलित ‘गाँजा व्यवस्थापन आयोग’ तत्काल गठन गर्न सरकारसँग माग समेत गरेको छ । आयोग गठन गरी बढी भन्दा बढी ग्रामिण तथा गरिब जनताको आर्थिक उत्थान हुने व्यवस्था गर्न पनि माग गरेको छ ।

विश्व हिन्दु युवा संघले गाजा वैधानिक बनाउन केन्द्रीय समितिबाट पारित गरेर गत पौष २७ गतेको राष्ट्रिय एकता तथा पृथ्वी जयन्तिमा माइतीघर मण्डलामा प्रदर्शन गरेको एक मात्र संगठन भएको वक्तव्यमा जनाइएको छ ।