हामी सबैकाे संसारन्यूज

२५ जेठ, धनगढी । सुदूरपश्चिम प्रदेशका मुख्यमन्त्री त्रिलोचन भट्टको विपक्षमा मतदान गर्ने एमालेका ७ जना प्रदेश सभा सदस्यलाई संसदीय दलले स्पष्टीकरण सोधेको छ ।

संसदीय दलका नेता प्रकाशबहादुर शाहले एमाले संसदीय दलको निर्णय तथा ह्वीपको अवज्ञा गर्ने ७ सांसदहरुसँग २४ घण्टे स्पष्टीकरण सोधेका हुन् ।

दलका नेता शाहले संसदीय दलको ह्रवीप उल्लंघन गर्दै मुख्यमन्त्री भट्टको मतको विपक्षमा मतदान गरेका रतन थापा, नेपालु चौधरी, लिलाधर भट्ट, पठानसिंह बोहरा, माया तामाङ, बलदेव रेग्मी र ग्याल्बोसिंह बोहरालाई स्पष्टीकरण माग्दै पत्र पठाएका छन् ।

पत्रमा संसदीय दलको विधान एवं दलको ह्रवीप उल्लंघन गर्नुको कारण सोधेका छन् । निर्धारित समयभित्र जवाफ नआए विधानबमोजिम कारबाही गर्ने चेतावनी दिइएको छ ।

‘तपाईले नेकपा (एमाले), प्रदेश सभा संसदीय दलको निर्देशन(ह्विप) उल्लंघन गर्ने गम्भिर प्रकृतिको अनुशासनहीन कार्य किन गर्नुभएको हो स्पष्ट खुलाई जेठ २६ गते ५ बजेभित्र नेकपा (एमाले) प्रदेश सभा संसदीय दलको कार्यालयमा लिखित स्पष्टीकरण पेश गर्नुहोला । समयभित्र स्पष्टीकरण पेश गर्नुभएन वा चित्तबुझ्दो स्पष्टीकरण दिनुभएन भने तपाईलाई नेकपा(एमाले), प्रदेश सभा संसदीय दलको विधान, २०७८ को माथि उल्लेखित व्यवस्था बमोजिम कार्वाही हुने जानकारी गराइन्छ ।’ स्पष्टीकरण पत्रमा भनिएकाे छ ।

सुदूरपश्चिम संसदीय दलमा माधव नेपाल पक्षधरको नेतृत्वसहित बहुमत संख्या छ । मुख्यमन्त्रीलाई विश्वास मत दिने पक्षमा १७ जना एमाले सांसदहरुले मतदान गरेका थिए । माधव पक्षको मत पाएर मुख्य मन्त्री त्रिलोचन भट्टले विश्वासको मत प्राप्त गरेका छन् ।