हामी सबैकाे संसारन्यूज

जेठ २८, पोखरा । गण्डकी प्रदेश प्रमुख सीताकुमारी पौडेलले २४ घण्टाको समय दिएर मुख्यमन्त्री नियुक्तिका लागि आधार पेश गर्न आह्वान गरेकी छन् ।

शुक्रबार प्रदेश प्रमुख सीताकुमारी पौडेलले संविधानको धारा १६८ उपधारा ५ अनुसार सरकारको दाबी गर्न आह्वान गरेकी हुन् ।

पृथ्वीसुब्बा गुरुङ गत वैशाख २९ मा संविधानको धारा १६८ (३) बमोजिम ठुलो दलको हैसियतमा मुख्यमन्त्रीमा नियुक्त भएका थिए । तर, संवैधानिक प्रक्रियाअनुसार बिहिबार विश्वासको मत माग्न प्रदेशसभा बैठकमा राखिएको प्रस्ताव असफल भएको थियो । जससँगै उनी स्वतः पदमुक्त भएका थिए ।

संवैधानिक प्रक्रियाअनुसार प्रदेश प्रमुखले गुरुङ्ग पदमुक्त भएसँगै धारा १६८ (५) अनुसार दाबी गर्न आह्वान गरेकी हुन्।

उपधारा (३) बमोजिम नियुक्त मुख्यमन्त्रीले उपधारा (४) बमोजिम विश्वासको मत प्राप्त गर्न नसकेमा उपधारा (२) बमोजिमको कुनै सदस्यले प्रदेश सभामा विश्वासको मत प्राप्त गर्न सक्ने अवस्था भएमा प्रदेश प्रमुखले त्यस्तो सदस्यलाई मुख्यमन्त्री नियुक्त गर्ने संवैधानिक व्यवस्था छ।