हामी सबैकाे संसारन्यूज

१३ असार, काठमाडौं । बागमती प्रदेशमा शनिबार थप ४ जना कोरोना संक्रमितको मृत्यु भएको छ ।

शनिबार सिन्धुलीका ५० र ४१ वर्षीय, सिन्धुपाल्चोकका ६० वर्षीय र धादिङका २८ वर्षीय पुरुष गरेर ४ जनाको मृत्यु भएको प्रदेशको सामाजिक मन्त्रालयले जनाएको छ । त्यस्तै शनिबार उपत्यकाको ललितपुर, भक्तपुर र काठमाडौंमा मृत्यु हुनेको संख्या शून्य रहेको छ ।

त्यसैगरी प्रदेशमा शनिबार पिसीआर र ऐन्टिजेन विधिबाट गरिएको ३१६१ नमुना परीक्षणमा ६७९ जना नयाँ संक्रमित थपिएका छन् । मन्त्रालयका अनुसार २४ घण्टामा थपिएको यो संख्या २१.४८ प्रतिशत हो । उपत्यकामा शनिबार २४९ जना नयाँ संक्रमित थपिएका थिए ।

हाल प्रदेशका विभिन्न अस्पताल तथा आइसोलेशन सेन्टरमा २८७ जनाको उपचार भइरहेको छ भने १३७ जना भेन्टिलेटरमा रहेका छन् । मन्त्रालयले प्रदेशमा अझै पनि कोरोना संक्रमणको जोखिम रहेकाले सावधानी अपनाउन समेत अनुरोध गरेको छ ।