२ फागुन,धनगढी । यहाँस्थित इन्भेष्टमेन्ट बैंकबाट हराएको रकम बैंककै एक कर्मचारीले चोरी गरेको खुलेको छ ।
बैंकको रु २३ लाख ४४ हजार चोरी गर्ने बैंककै कर्मचारी गोविन्द उपाध्यायलाई प्रहरीले पक्राउ गरी आज पत्रकार सम्मेलनमार्फत् सार्वजनिक गरेको छ ।
जिल्ला प्रहरी कार्यालय कैलालीका प्रहरी उपरीक्षक अरुणचन्द ठकुरीको नेतृत्वको टोलीले चोरी रकमसहित उपाध्यायलाई पक्राउ गरेको हो ।
उपाध्यायले माघ २८ गते बैंकको एटिएम लकको पासवर्ड पत्ता लगाई उक्त रकम चोरी गरेको अनुसन्धानबाट पत्ता लागेको प्रहरी नायब उपरीक्षक वीरबहादुर बुढामगरले बताउनुभयो ।
उहाँले बैंकमा रहेको सिसी क्यामेरा बन्द गरी उपाध्यायले एटिएममा राखिएको उक्त रकम एटिएमको लक खोलेर चोरी गरेको पाइएको जानकारी दिनुभयो ।
चोरी गरेको रकम निजले आफन्तको घरमा लुकाइ राखेको अवस्थामा प्रहरीले बरामद गरेको छ । रकम चोरी भएपछि बैंकले आइतबार जिल्ला प्रहरी कार्यालयमा खोजविनका लागि निवेदन दिएपछि प्रहरीले अनुसन्धान थालेको थियो । रासस
