हामी सबैकाे संसारन्यूज

१६ असार काठमाडौं । नबिल बैंकले ‘नबिल दिगो बैंकिङ’ स्थापनाको घोषणा गरेको छ । बैंकले मंगलबार ‘भर्चुअल’ कार्यक्रममार्फत उक्त घोषणा गरेको हो । बैंकिङ पहुँच नपुगेकाहरूलाई वित्तीय पहुँच प्रदान गर्दै देशको सबैभन्दा दुर्गम स्थानहरूमा उद्यमशीलतालाई प्रबद्र्धन गर्ने उद्देश्यअनुसार नबिल दिगो बैंकिङ  स्थापना गरिएको बैंकले जनाएको छ ।

‘संयुक्त राष्ट्र संघको दिगो विकास लक्ष्यहरूसँग पंक्तिबद्ध भएर नबिल दिगो बैंकिङले भौगोलिक, जनसांख्यिकीय र आर्थिक स्तरसम्मगएर सुदृढ नेपालको लागि स्थायी लघुउद्यम सिर्जना गर्नको निमित्त सुविधाहरू प्रदान गर्ने सोच नबिलले लिएको छ,’ बैंकद्वारा जारी विज्ञप्तिमा भनिएको छ ।

बैंकका अध्यक्ष उपेन्द्रप्रसाद पौड्यालले समग्र बैंकिङ क्षेत्रले लाखौंको जीवनलाई छुने र सबै पक्षमा सकारात्मक प्रभाव ल्याउन सक्षम भएको बताए । ‘हामीले मानिस, वातावरण, समुदाय, राष्ट्रिय अर्थव्यवस्था र पूरै देशको जीवनमा पार्ने प्रभावहरूको बारेमा सचेत रहन आवश्यक छ । तसर्थ, नबिल बैंकले दिगो बैंकिङ विभाग स्थापना गरेको छ,’ उनले भने ।