हामी सबैकाे संसारन्यूज

१९ असार, काठमाडौं । प्रधानमन्त्री एवम् नेकपा एमाले अध्यक्ष केपी शर्मा ओलीले ओहोदाका लागि बार्गेनिङ्ग गर्नेसँग एकता नहुने बताएका छन् ।

शनिबार केन्द्रीय कमिटीको बैठकलाई सम्बोधन गर्दै एमाले अध्यक्ष ओलीले वरिष्ठ माधव नेपाल पक्षलाई पार्टीमा फर्केर आए ठीकै भन्दै अन्यथा बार्गेनिङ गर्नेसँग एकता नहुने बताएका हुन् ।

पार्टीमा आए अझैँ समय रहेको जनाउँदै उनले तर ओहोदाका लागि बार्गेनिङ गरे आउन नपर्ने बताएका छन् । ‘पार्टीमा फर्केर आए समय छ, ओहोदाका लागि बार्गेनिङ भए काम पनि छैन । बार्गेनिङ गर्ने मान्छेले काम पनि गर्दैन ।’

उनले एकताका लागि भन्दै वर्षौ सम्म कुर्न नसकिने समेत बताएका छन् । ‘अझैँ पनि सच्चिएर आए समय छ तर, दश वर्षसम्म पर्खन सकिँदैन ।’ उनले अगाडि भने ‘मान्छेले गल्ती गर्छ तर, सप्रिएर आउनुपर्छ । तर, कोहीकोहीलाई लामो बिरामी लाग्ला । निको हुन दश वर्ष लाग्ला के गर्नु ? त्यसकारण यो दश वर्ष पर्खाइको समय हुँदैन ।’

पार्टीले भनेको नमान्ने तर पार्टीको विपक्षमा बोल्ने पार्टीको कार्यकर्ता र नेता हुन नसक्ने बताए । उनले एकताका लागि आफू निकै लचिलो हुँदा पनि अर्को पक्ष भने सँधै खोचे थाप्ने र समस्या मात्र उत्पन्न गर्ने काम गरेको गुनासो समेत गरेका छन् ।