Sansar News
१९ असार, काठमाडौँ । नेकपा एमाले झलनाथ खनाल–माधव पक्षले सर्वोच्चमा विचाराधिन रहेको मुद्धाको हस्ताक्षर फिर्ता नलिने बताएको छ । ।
प्रधानमन्त्री तथा नेकपा (एमाले) अध्यक्ष केपी शर्मा ओलीले फोन गरी काँग्रेस सभापति शेरबहादुर देउवालाई प्रधानमन्त्री बनाउने भनेर गरेको हस्ताक्षर फिर्ता लिन भनि गरेको आग्रहमा नेता माधव नेपालले यस्तो जवाफ दिएका हुन् ।
शनिबार भएको टेलिफोन वार्तामा वरिष्ठ नेता माधव कुमार नेपाल सर्वोच्चमा विचारधिन रहेको मुद्धाको हस्ताक्षर कुनै पनि हालतमा फिर्ता नलिने अडानमा रहेको बताएको स्रोतले जनाएको छ ।
जवाफमा अध्यक्ष ओलीले हस्ताक्षर फिर्ता नभएको अवस्थामा पार्टी एकता हुन नसक्ने बताएका थिए ।
नेता नेपालले आवश्यक सल्लाह र परामर्श विना राखिएको केन्द्रीय कमिटीको बैठक तत्काल रोकी एकताको वातावरण बनाउन आग्रह गरेको तर अध्यक्ष ओलीले भने सोमबार सम्म हस्ताक्षर फिर्ता नलिए पार्टी एकता सम्मव नहुने बताएको पनि सो स्रोतले जनाएको छ ।
यसअघि शुक्रबारको केन्द्रीय कमिटीको बैठकमा अध्यक्ष ओलीले नेता नेपाललाई सोमबार साँझ सम्ममा हस्ताक्षर फिर्ता गर्न डेटलाईन दिएका थिए । नेता नेपालले पार्टी एकताका लागि बनेको कार्यदललाई सक्रिय बनाउन ओली समक्ष प्रस्ताव राखेका छन् ।
एकताका लागि मध्यस्थता गरिरहेका पार्टी उपमहासचिव घनश्याम भुसाल टेलिफोन संवाद गराउन नेता नेपाल निवासमै पुगेका थिए ।
वि.सं.२०७८ असार १९ शनिवार १९:११ मा प्रकाशित
