Sansar News
२३ असार, काठमाडौं । प्रतिनिधि सभा विघटनविरूद्ध आन्दोलनरत ५ विद्यार्थी संगठनले थप आन्दोलनका कार्यक्रमहरु घोषणा गरेका छन् । मंगलबार बसेको विद्यार्थी संगठनहरुको संयुक्त बैठकले थप आन्दोननका कार्यक्रमहरु सार्वजनिक गरेको हो ।
संयुक्त विद्यार्थी संगठनले संसद विघटन, केपी ओलीको निरंकुशता, अधिनायकवाद र स्वेच्छाचारी शासनको विरुद्धमा संचालन भएको पहिलो चरणको आन्दोलन सफल भएको समिक्षा गर्दै थप आन्दोलनका कार्यक्रम सार्वजनिक गरिएको छ ।
बैठकले प्रतिगमनविरुद्धको आन्दोलनका लागि असार २४ गते देशैभर सिठ्ठी जुलुस र असार २७ मा माइतीघरमा शंख फुकेर विरोध प्रदर्शन गर्ने जनाएको छ । बैठकले सर्वोच्च अदालतले प्रतिनिधिसभाको पुनस्र्थापना गर्ने कुरामा संयुक्त विद्यार्थी संगठन विश्वस्त रहेको बताइएको छ ।
विद्यार्थी संगठनहरूले धरानस्थित बिपी कोइराला स्वास्थ्य विज्ञान प्रतिष्ठानमा भइरहेको आन्दोलनमा ऐक्यवद्धता जनाएका छन् । बिपीका उपकुलपति ज्ञानेन्द्र गिरीलगायत बर्खास्त हुनुपर्ने मागमाथि ऐक्यवद्धता प्रकट गरिएको छ ।
यस्तै शिक्षक सेवा आयोगले लामो समयसम्म परीक्षा बन्द गरेकोले देशभर हजारौँ शिक्षक दरबन्दी खाली भएका कारण पठनपाठनमा गम्भिर असर पुगेको ठहर गर्दै शिक्षक सेवा आयोगको परीक्षा लिने प्रक्रिया तत्काल अगाढि बढाउन माग गरिएको छ ।
साथै संगठनले चितवनमा रहस्यमय मृत्यु भएकी सुजिता भण्डारीको अबिलम्ब छानविन गरी सत्यतथ्य सार्वजनिक गर्न पनि माग गरेको छ ।
वि.सं.२०७८ असार २३ बुधवार १०:५६ मा प्रकाशित
