हामी सबैकाे संसारन्यूज

असार २३, काठमाडौं । नेकपा (माओवादी केन्द्र)को दल दर्ता खारेजीको माग गर्दै एमालेभित्रका पूर्वमाओवादी समूह निर्वाचन आयोग जाने भएका छन् । एमाले प्रवेश गरेका उनीहरुलाई माओवादी केन्द्र कारबाही गरेपश्चात यस्तो माग राख्दै आयोग जान लागेका हुन् ।

उनीहरुले आफुँहरुमाथि गरिएको कारबाही अबैधानिक रहेको दाबी गरेका छन् । एमालेका नेता प्रभु साहले आफुँहरुमाथि गरिएको कारबाही अबैधानिक रहेको भन्दै आयोगमा जान लागेको बताए । उनका अनुसार लामो समयदेखि महाधिवेशन नै नगरेको माओवादी केन्द्र विधानतः अवैधानिक छ ।

‘हामी प्रत्यक्ष निर्वाचित सांसद हौँ, महाधिवेशन नै नगरेका प्रचण्डले हामीमाथि गरेको कारबाही वैधानिक छैन्’, नेता प्रभु साहले भनेका छन्, ‘त्यसैले अवैधानिक रुपमा गरिएको कारबाही फिर्ताको माग गर्दै आयोगमा निवेदन दिन लागेका हौं ।’

उनका अनुसार केहिबेरमा उनीहरू समूहगत रूपमै आयोगमा जाँदैछन् । यसअघि उनीहरू आयोगमा जाने विषयमा छलफलमा थिए ।

पूर्वमाओवादी नेता साह, टोपबहादुर रायमाझी, लेखराज भट्ट र गौरीशंकर चौधरी माओवादी केन्द्रबाट प्रत्यक्ष निर्वाचित प्रतिनिधिसभा सदस्य हुन् । एमालेमा प्रवेश गरेपछि उनीहरुलाई माओवादी केन्द्रले कारवाही गरेको थियो । माओवादीबाट कारवाही परेसँगै उनीहरुको सांसद पद खारेज भएको थियो ।

माओवादीले चार प्रत्यक्ष निर्वाचित प्रतिनिधि सभा सदस्यसहित दल बदल्ने पूर्वगृहमन्त्रीसमेत रहेका राष्ट्रिय सभा सदस्य रामबहादुर थापा बादलसहित ८ प्रदेशसभा सदस्यलाई पार्टीबाट कारबाही गरेको थियो ।