Sansar News
२३ असार, काठमाडौं । हाइटीका राष्ट्रपति जाभोनेल मोइसेको आफ्नै निवासमा हत्या भएको छ ।
हाइटी सरकारले हतियारधारी एक समु्हद्धारा राष्ट्रपति जाभोनेलको राजधानी पोर्ट ओ प्रिन्सस्थित निवासमै हत्या भएको जानकारी दिएको छ ।
हाइटीका प्रधानमन्त्री क्लाउडे जोसेपले एक विज्ञप्ति जारी गर्दै राष्ट्रपति मोइसेको स्थानीय समय रातको १ बजे निजी निवासमै हत्या भएको बताएको समाचार ऐजेन्सीले जनाएका छन् ।
राष्ट्रपति मोइसेको हत्यामा संलग्नहरुको पहिचान हुन नसकेको र उनीहरु स्पेनिश भाषा बोल्ने मानिसहरु रहेको विज्ञप्तिमा बताइएको छ । अज्ञात समुहको आक्रमणले मोइसेकी पत्नीमाथि पनि गोली लागेको विज्ञप्तिमा जनाइएको छ । प्रधानमन्त्री जोसेपले उक्त घटनलाई ‘घृणित र बर्बर कार्य’ भएको बताएका छन् ।
५३ वर्षीय मोइसे २०१७ मा सत्तामा पुगेका थिए । उनीविरुद्ध कयौं भ्रष्टाचारको आरोप लागेको र त्यसलाई लिएर उनीविरुद्ध विरोध प्रदर्शनहरु पनि हुने गरेको बताइएको छ ।
वि.सं.२०७८ असार २३ बुधवार १७:२० मा प्रकाशित
