हामी सबैकाे संसारन्यूज

असार २४, काठमाडौं । नेकपा (एमाले)को विवाद समाधान गर्न गठित कार्यदलको बैठक सुरु भएको छ । बैठक सिंहदरबारस्थित अर्थ मन्त्रालयमा केहीबेर अघि सुरु भएको हो ।

बैठक अघि कार्यदलका सदस्य र शीर्ष नेताहरुबीच छलफल भएको थियो । बैठकअघि कार्यदलका संयोजक र अध्यक्ष केपी शर्मा ओली पक्षीय नेता एवं अर्थमन्त्री विष्णु पौडेलबीच अर्थमन्त्रालयमै छलफल चलेको थियो ।

अर्थमन्त्रालयको छलफलपश्चात नेता रावलले माधव नेपालसँग भेटवार्ता गरेका थिए । नेता नेपालसँग भेट गरेर रावल फर्किएपछि कार्यदलको बैठक सुरु भएको हो ।

लामो समयदेखि निष्क्रिय कार्यदल सोमबारको बैठकसँगै सक्रिय बनेको छ । सोमवारदेखि शुरू भएको कार्यदलको बैठक सहमति उन्मुख भएको सदस्यहरूले बताउँदै आएका छन्।

बुधबार कार्यदल निष्कर्ष नजिक पुगेसँगै साँझ एमाले अध्यक्ष केपी शर्मा ओली र वरिष्ठ नेता माधवकुमार नेपालबीच भेटवार्ता भएको थियो। दुई नेताबीच मेरियट होटलमा झण्डै दुई घण्टा वान अन वान वार्ता भएको थियो। शीर्ष नेताहरुबीचको वार्तापछि कार्यदलका सदस्यहरु आशावादी देखिएका छन्।