Sansar News
२७ असार, काठमाडौं । बीपी प्रतिष्ठान धरानमा भइरहेको चरम बेथितीविरुद्ध सडक प्रदर्शनमा उत्रिएका नागरिक अभियन्ताहरू काठमाडौंको सिंहदरबार क्षेत्रबाट पक्राउ परेका छन् ।
बीपी कोइराला स्वास्थ्य विज्ञान प्रतिष्ठान धरानका पदाधिकारीलाई पदमुक्त गरी नयाँ पदाधिकारी चयन गर्न माग गर्दै सिंहदरबारको दक्षिण गेटमा प्रदर्शनमा उत्रिएका उनीहरुलाई प्रहरीले पक्राउ गरेको हो ।
पक्राउ पर्नेमा वृहत नागरिक आन्दोलनका अभियन्ता नारायण वाग्ले, खगेन्द्र संग्रौंला, विमल अर्याल, अर्चना थापा, सञ्जिव उप्रेती, श्रवण मुकारुङलगायत रहेका छन् ।
अभियन्ताहरुले नयाँ पदाधिकारी दलीय भागवण्डा नभइ वस्तुगत मापदण्डका आधारमा नियुक्त गर्न माग गरेका छन् । भ्रष्टाचारको बचाउ गर्नेबाहेक सरकारले अहिलेसम्म केही नगरेको तथा आन्दोलनको चार साता बित्दा अहिलेसम्म वार्ताको पहलसमेत नगरेको गुनासो अभियन्ताहरुको छ।
चिकित्सा शिक्षा ऐनमा २०८० सम्म सबै प्रदेशमा कम्तीमा एउटा सरकारी मेडिकल कलेज पुर्याउने भने पनि सरकारले त्यसका लागि कुनै काम नगरेको उल्टै निजी अस्पतालहरुको व्यापारका लागि बीपी प्रतिष्ठानजस्ता संस्थालाई बर्बाद पारिरहेको उनीहरुको आरोप छ । उनीहरुले पदाधिकारी संलग्न भ्रष्टाचारका बारेमा कुनै छानबीन नभएकामा आपत्ति जनाउँदै सरकारको ध्यानाकर्षण पनि गराएका हुन् ।
प्रहरीका अनुसार अभियन्ताहरुले निषेधित क्षेत्र तोडेकाले नियन्त्रणमा लिनु परेको हो ।उनीहरुलाई महेन्द्र पुलिस क्लबमा राखेको खबर छ।
वि.सं.२०७८ असार २७ आइतवार १२:४१ मा प्रकाशित
