हामी सबैकाे संसारन्यूज

असार २९, काठमाडौं । निवर्तमान प्रधानमन्त्री एवं नेकपा (एमाले)का अध्यक्ष केपी शर्मा ओलीले सर्वोच्च अदालतको फैसलाप्रति तिव्र असन्तुष्टी जनाएका छन् । मंगलबार प्रधानमन्त्रीबाट विदाई हुनुअघि देशबासीका नाममा सम्बोधन गर्दै उनले संविधानमा हुँदै नभएका व्यवस्थाको व्याख्या गरिएको आरोप लगाए ।

उनले जनताको मत आफुँलाई मात्रै रहेको बताउँदै प्रधानमन्त्रीमा नियुक्त कांग्रेस सभापति शेरबहादुर देउवाको पनि आलोचना गरे । ‘जनताको जनादेश त मेरो पक्षमा थियो तर, परमादेश शेरबहादुरजीको पक्षमा भयो,’ उनले भने ।

ओलीले २०५२ सालमा मनमोहन अधिकारीले नेतृत्व गरेको सरकार अपदस्थ भएपछि राजनीतिलाई ट्रयाकभन्दा बाहिर लगियो भने दुष्परिणाम ल्याउँछ भनेर आफूले भविष्यवाणी गरेको र अन्ततः त्यस्तै भएको पनि जिकिर गरे ।

ओलीले शेरबहादुरको लागि सर्वोच्चको संवैधानिक इजलासले संविधानको गलत व्याख्या गरेको बताए । ओलीले भने, ‘निश्चित व्यक्तिका निश्चित आकांक्षा परिपूर्तिका लागि संविधानको अपव्याख्याले वस्तुत संविधान संशोधन काम गरेको छ ।’