हामी सबैकाे संसारन्यूज

असार २९, काठमाडौं । राष्ट्रपति विद्यादेवी भण्डारीले कांग्रेस सभापति शेरबहादुर देउवालाई संविधानको कुनै धारा नै उल्लेख नगरी नियुक्त गरेकी छिन् । राष्ट्रपति कार्यालयले सार्वजनिक गरेको पत्रमा देउवाको नियुक्ती संविधानको कुनै धाराअनुसार नभई अदालतको आदेशअनुसार भएको उल्लेख छ ।

‘सम्माननीय राष्ट्रपति श्रीमती विद्यादेवी भण्डारीज्यूबाट श्री सर्वोच्च अदालत, संवैधानिक इजलासको मिति २०७८/३/२८ को फैसला बमोजिम प्रतिनिधिसभाका सदस्य एवम् नेपाली कांग्रेस संसदीय दलका नेता माननीय श्री शेरबहादुर देउवाज्यूलाई प्रधानमन्त्री पदमा नियुक्त गर्नुभएको छ’, मंगलबार राष्ट्रपति कार्यालयबाट जारी विज्ञप्तीमा भनिएको छ ।

अदालतले देउवालाई संविधानको धारा ७६ (५) अनुसार प्रधानमन्त्री पदमा नियुक्त गर्न परमादेश जारी गरेको थियो । तर, राष्ट्रपति कार्यालयले भने उक्त धारालाई उल्लेख नै नगरी नियुक्ती गरेको विज्ञप्ती सार्वजनिक गरेको छ ।

तर, यसअघिका नियुक्तीमा संविधानको धारा उल्लेख

यसअघि प्रधानमन्त्रीका रुपमा नियुक्ती गर्दा राष्ट्रपति कार्यालयले सार्वजनिक गर्ने विज्ञप्तीमा भने संविधानको धारा उल्लेख गर्ने गरिएको थियो । राष्ट्रपति कार्यालयले निवर्तमान प्रधानमन्त्री केपी शर्मा ओलीले नियुक्त गर्दा संविधानको धारा उल्लेख गर्ने गरेको थियो ।

गत वैशाख ३० मा विश्वासको मत नपाएपछि ठूलो दलको रुपमा गरिएको नियुक्तीमा पनि राष्ट्रपति कार्यालयले प्रष्ट रुपमा संविधानको धारा उल्लेख गरेको थियो । ‘नेपालको संविधानको धारा ७६ को उपधारा (३) बमोजिम प्रतिनिधिसभामा सबैभन्दा बढी सदस्यहरू भएको दल नेपाल कम्युनिष्ट पार्टी (एमाले) को संसदीय दलका नेता माननीय श्री केपी शर्मा ओलीज्यूलाई प्रधानमन्त्री पदमा नियुक्त गर्नुभएको छ’ वैशाख ३० नियुक्ती गर्दा जारी विज्ञप्तीमा भनिएको छ ।

कानुन विद्हरुले संविधानको धारा ७६ (५) अनुसार नियुक्तीको परमादेश जारी भएको सन्दर्भमा राष्ट्रपति कार्यालयले सो धारा उल्लेख गर्नुपर्ने बताउँछन् ।