हामी सबैकाे संसारन्यूज

३० असार, काठमाडौँ । बालुवाटारको ललितानिवास जग्गा भ्रष्टाचार प्रकरणका अभियुक्त एवं पूर्वउपप्रधानमन्त्री विजयकुमार गच्छदार विशेष अदालतबाट १० लाख रुपैयाँ धरौटीमा रिहा भएका छन् ।

विशेष अदालतका अध्यक्ष न्यायाधीश प्रेमराज कार्की तथा सदस्य न्यायाधीशहरू ​अब्दुल अजिज मुसलमान र नित्यानन्द पाण्डेयको इजलासले गच्छदारलाई १० लाख धरौटि बुझाएर रिहा गर्न आदेश दिएको हो । अदालतको आदेश लगत्तै गच्छदार १० लाख रुपैयाँ धरौटि बुझाएर रिहा भएका हुन्।

फरार रहेको भनिएका गच्छदार आज अदालत हाजिर भएर बयान दिएका थिए । बयान ४ घण्टा चलेको थियो । बयान सकिएसँगै उनीमाथि थुनछेक बहस चलेको थियो।

ललिता निवास प्रकरणमा भ्रष्टाचारको अभियोगमा अख्तियार दुरुपयोग अनुसन्धान आयोगको टोलीले उपसभापति गच्छदारविरुद्ध विशेष अदालतमा मुद्दा दर्ता गरेको थियो। ललिता निवास प्रकरणमा सरकारी जग्गा व्यक्तिको नाममा गराएको भन्दै भ्रष्टचार अभियोगमा २०७६ माघ २२ गते विशेष अदालतमा उनीसँगै एक पूर्वउपप्रधानमन्त्री, तीन पूर्वमन्त्री तथा पूर्व सचिवसहित १७५ जनाविरुद्ध मुद्दा दायर भएको थियो ।

गच्छदारविरुद्ध अदालतमा ९ करोड ६५ लाख ७६ हजार बिगो र जरिवानासहित कैद माग गरिएको थियो।