हामी सबैकाे संसारन्यूज

असार ३१, काडमाडौं । नेकपा (एमाले)का अध्यक्ष केपी शर्मा ओली पक्षीय युवा संघले युथ फोर्सको पुनर्गठन गरेलगत्तै वरिष्ठ नेता माधवकुमार नेपाल पक्षले पनि अखिल फोर्सको गठन गरेको छ । बिहीबार एक कार्यक्रमका बीच माधव पक्षले अखिल फोर्सको गठनको घोषणा गरेको हो ।

माधव पक्षले तपेन्द्रजंग शाहीको कमाण्डमा अखिल फोर्सको घोषणा गरेको छ । अखिल फोर्सको घोषणा गर्दै अनेरास्ववियुका केन्द्रीय अध्यक्ष सुदेश पराजुलीले ओली समूहलाई काउन्टर दिन अखिल फोर्सको घोषणा गरेको बताए ।

उनका अनुसार अखिल फोर्सलाई तत्कालै देशव्यापी बनाउने पनि निर्णय गरिएको छ । ‘ओली समूहलाई ‘काउन्टर’ दिन अखिल फोर्स गठन गरेका हौं, अब देशैभर संगठन निर्माण हुन्छ, फोर्सले शैक्षिक माफिया र अराजकता मच्चाउने विरुद्व अभियान चलाउँछ’, उनले भने ।

ओली पक्षले गत सोमबार क्षितिज थेवेको नेतृत्वमा युथ फोर्स पुनर्गठनको घोषणा गरेको थियो । २०६५ मा तत्कालिन नेकपा (माओवादी)को युवा दस्ता वाईसिएलसँग भिड्न खोलिएको युथ फोर्स पछिल्लो समय निस्क्रिय थियो ।