Sansar News
साउन १३, काठमाडौं । प्रधानमन्त्री शेरबहादुर देउवाको पक्षमा मतदान गरेका नेकपा (एमाले)को माधवकुमार नेपाल पक्षीय सांसदहरुले सरकारमा सहभागी हुनुपर्ने मत राखेका छन् । बुधबार भएको छलफलमा उनीहरुले यस्तो मत राखेको सांसद मेटमणि चौधरीले जानकारी दिए ।
‘सबै सांसदहरुले सरकारमा सहभागी हुनुपर्छ भन्नुभएको छ, हामी सबै एक छौँ, माधव नेपालले पनि सरकारमा सहभागी नहुने भनेर अहिलेसम्म भन्नुभएको छैन’, उनले भनेका छन् ।
नेता नेपालले बुधबार आफू निकट २२ सांसदलाई बोलाएर सरकार र पार्टी अध्यक्ष केपी शर्मा ओलीले राखेको प्रस्तावबारे सुझाब मागेका थिए । बुधबार नेपालले सुझाब मागेकामध्ये अधिकांश सांसदले सरकारमा सहभागी हुनुपर्ने सुझाब राखेका थिए ।
त्यस्तै पार्टी अध्यक्ष ओलीबाट दोस्रो अध्यक्षको प्रस्ताव आएको सन्दर्भमा सांसदहरुले प्रस्ताव स्वीकार गर्न नसकिने सुझाब दिएको बताइएको छ । सांसदहरुले ओलीको प्रस्ताव भर पर्न सक्ने नभएको बताएका छन् ।
वि.सं.२०७८ साउन १३ बुधवार १७:५६ मा प्रकाशित
