हामी सबैकाे संसारन्यूज

१३ साउन, काठमाडौँ । कक्षा १२ का विद्यार्थीलाई परीक्षाअघि नै खोपको व्यवस्था गर्न संसदीय समितिले सरकारलाई निर्देशन दिएको छ ।

प्रतिनिधि सभाको शिक्षा तथा स्वास्थ्य समितिले साउन ३१ गते शुरु हुने कक्षा १२ का विद्यार्थीलाई परिक्षा अगावै खोपको व्यवस्था गर्न निर्देशन दिएको हो ।

कक्षा १२ को परीक्षालगायतका विभिन्न विषयमा संसदीय समितिले बुधबार शिक्षा, विज्ञान तथा प्रविधि मन्त्रालयका अधिकारीसँग छलफलमा यस्ताे  निर्देशन गरेको हाे । समितिले परीक्षा दिनुअघि कोरोना परीक्षण गर्न र कोरोना संक्रमण भई परीक्षा दिन नसक्ने भए दोस्रो चरणमा दिन पाउने व्यवस्था गर्न समेत निर्देशन दिएको समिति सभापति जयपुरी घर्तीले बताइन् ।

यस्तै समितिले बढी विद्यार्थी भएका विद्यालयमा परीक्षा सञ्चालन गर्न कठिनाइ हुने भएकाले स्वास्थ्य सुरक्षाका मापदण्ड पालना गरेर बढी केन्द्र बनाएर परीक्षा सञ्चालन गर्ने व्यवस्था गर्न सुझाव दिएको छ।

राष्ट्रिय परीक्षा बोर्डले कक्षा १२ का परीक्षा साउन ३१ गतेबाट भदौ ९ गतेसम्म सञ्चालन गर्ने गरी तालिकासमेत सार्वजनिक गरिसकेको छ । बोर्डले कोरोना महामारीका कारण यसपटक होम सेन्टर (विद्यार्थीले पढेकै विद्यालय) मा नै परीक्षा लिइने व्यवस्था गरेको छ ।