हामी सबैकाे संसारन्यूज

२० साउन, काठमाडौं । पछिल्लो २४ घण्टामा देशभर ४ हजार १०७ जना कोरोना संक्रमित थपिएका छन् ।

स्वास्थ्य तथा जनसंख्या मन्त्रालयका अनुसार बुधवार पिसीआर र एन्टिजेन विधिबाट १६ हजार २९८ नमुना परीक्षण गर्दा ४ हजार १०७ जनामा कोरोनाभाइरस संक्रमण पुष्टि भएको हो ।

आज काठमाडौंमा ९०८, ललितपुरमा १६५ र भक्तपुरमा २०६ जना गरी उपत्यकामा आज १२७९ जना नयाँ संक्रमित थपिएका छन् । मंगलवारको तुलनामा आज उपत्यकामा संक्रमित हुनेको संख्या झण्डै ३ सयले बढेको हो ।

यस्तै पछिल्लो २४ घण्टामा कोरोना संक्रमणबाट ३५ जनाको मृत्यु भएको छ । आज थपिएका ३५ जनासँगै नेपालमा कोरोना संक्रमणबाट मृत्यु हुनेको संख्या ९,९५७ पुगेको छ ।

स्वास्थ्य मन्त्रालयका अनुसार पछिल्लो २४ घण्टामा १ हजार ५३५ जना कोरोनाबाट मुक्त भएका छन् । योसँगै नेपालमा कोरोना संक्रमणबाट निको हुनेको संख्या ६ लाख ६१ हजार ६५१ पुगेको छ ।

त्यस्तै देशभर सक्रिय संक्रमितको संख्या ३३ हजार ४६४ रहेको स्वास्थ्य मन्त्रालयले जनाएको छ । ती मध्ये ३० हजार २७० जना होम आइसोलेशनमा र ३ हजार १९४ जना संस्थागत आइसोलेशनमा उपचारत रहेका छन् ।

मन्त्रालयका अनुसार हाल देशैभरीका आइसीयुमा ७१४ जना र भेन्टिलेटरमा १५६ जनाको उपचार भइरहेको छ ।

त्यसैगरी मंगलवार देशैभरी ३२ हजार ५९ जनाले कोरोना भाइरस विरुद्धको खोप लगाएको पनि मन्त्रालयले जानकारी दिएको छ ।

साउन यता संक्रमणदर तिब्ररुपमा वृद्दि
मन्त्रालयले साउनयता संक्रमणको दर तिब्ररुपमा बढ्दै गएको जनाएको छ । असार अन्त्यदेखि साउनको २० गतेसम्म आउँदा मकवानपुर, काभ्रे, नवलपरासीपूर्व, बाग्लुङ र रुपन्देहीमा संक्रमितको संख्या बढ्दै गएको हो ।

यो साता थपिए २३ हजार बढी संक्रमित
मन्त्रालयका अनुसार यो सातामा देशैभरी २३ हजार २७५ जना नयाँ संक्रमित थपिएका छन् । ती मध्ये १२ हजार ५७९ जना संक्रमणबाट मुक्त भएका छन् भने १६६ जनाको मृत्यु भएको छ ।

त्यस्तै नेपालमा हालसम्म पहिलो मात्राको खोप लगाउनेको संख्या ४२ लाख ९७ हजार ६१३ रहेको छ भने पूर्णमात्रामा खोप लगाउनेको संख्या २० लाख ७४ हजार ७८६ रहेको छ ।

नेपालमा हालसम्म पिसीआर प्रविधिबाट गरिएको ३७ लाख ४४ हजार ४७२ नमुना परीक्षणमा ७ लाख ५ हजार ७२ जनामा संक्रमण र ३ लाख ३६ हजार ८२३ ऐन्टिजेन नमुना परीक्षणमा ६४ हजार ८८५ जनामा संक्रमण पुष्टि भएको छ । हालसम्म दुवै विधिबाट गरिएको कूल ३९ लाख ८१ हजार ३९५ नमुना परीक्षणमा हालसम्म संक्रमित हुनेको संख्या ७ लाख ६९ हजार ९२२ पुगेको छ ।

आज देशैभरी ३,३८३ जनामा कोरोना संक्रमण पुष्टि, २४ को मृत्यु